Իսպանական ընկերությունը ՀՀ-ում կիրականացնի ճանապարհների վերակառուցման եւ բարելավման աշխատանքներ

«Հյուսիս-հարավ» ճանապարհային միջանցքի ներդրումային ծրագրի՝ Տրանշ 1 (Երևան-Արարատ և Երևան-Աշտարակ) և Տրանշ 2 (Աշտարակ-Թալին) ճանապարհի վերակառուցման և բարելավման շինարարական աշխատանքների կապալառու, ինչպես նաեւ ծրագրի կառավարման խորհրդատու եւ շինարարության տեխնիկական վերահսկողություն իրականացնող ընկերություններն արդեն հայտնի են:

Տրանշ 1 եւ Տրանշ 2 ճանապարհի վերակառուցման եւ բարելավման աշխատանքները կիրականացնի իսպանական «Կորսան Կորվիամ Կոնստրուքսյոն Էս Ա» ընկերությունը, իսկ կառավարման խորհրդատվությունը եւ տեխնիկական վերահսկողությունը՝ ֆրանսիական «Սաֆեժ» եւ իսպանական «Էպտիսա» ընկերություններից կազմված համատեղ ձեռնարկությունը:

«Կորսան Կորվիամ Կոնստրուկսյոն Էս-Ա» ընկերությունը ունի 80 տարվա պատմություն: Այն գործում է 30 երկրներում (ԱՄՆ, Մեքսիկա, Արգենտինա, Բրազիլիա, Կոլումբիա, Իսպանիա, Հնդկաստան, Բանգլադեշ, Ալժիր, Անգոլա, Քենիա): Ընկերության 2010թ-ի դրամական շրջանառությունը կազմել է 1.4 մլդ ԱՄՆ դոլար: «Կորսան Կորվիամ»-ն իր գործունեությունը հիմնականում ծավալում է հետևյալ բնագավառներում՝ կոնցեսիա, էներգետիկա, շինարարություն և արդյունաբերական ծառայություններ:

Ընկերությունը կառուցել և շահագործում է 1700 կմ ավտոճանապարհներ Իսպանիայում, Հնդկաստանում, Բրազիլիայում և Մեքսիկայում:

«Սաֆեժ» ընկերությունը հիմնադրվել է 1919 թ.: Այն իր բնագավառում (ծրագրերի կառավարում, նախագծերի և շինարարության վերահսկողություն, գործառնական աջակցություն և ենթակառուցվածքների մշակում և զարգացում) հանդիսանում է Եվրոպայի առաջատար ընկերություններից մեկը և գործունեություն է ծավալում Եվրոպայում, Միջին Արևելքում, ԱՊՀ երկներում, Կենտրոնական Ասիայում ու Աֆրիկայում: Ընկերությունն ունի ճանապարհային ենթակառուցվածքների ծրագրերի նախածման և շինարարության վերահսկման, տեխնիկական աջակցության, գործառնական և ֆինանսական կառավարման հարուստ փորձ:

«Էպտիսա» ընկերությունը հիմնվել է 1956 թ, և համարվում է Իսպանիայի ճարտարագիտական և խորհրդատվական լավագույն ընկերություններից մեկը: Գործունեությունը ծավալում է հետևյալ բնագավառներում՝ ճարտարագիտություն, խորհրդատվություն, ծրագրերի կառավարում, շինարարություն, տեղեկատվական տեխնոլոգիաներ և սոցիալական բարեկեցության ծառայություններ: Ունի գրասենյակներ Արևելյան Եվրոպայում, Կովկասում և Կենտրոնական Ասիայում:

Գործունեության հիմնական ոլորտներն են՝ շրջակա միջավայրի կառավարում, տրանսպորտային ենթակառուցվածքներ, շինարարություն, ճարտարապետություն և էներգետիկա: