«Հայկական Ժամանակ». Երկու թեկնածու Բրյուսովի համալսարանի ռեկտորի թափուր պաշտոնի համար

Երևանի Վ. Բրյուսովի անվան պետական լեզվաբանական համալսարանի ռեկտորի թափուր պաշտոնի մրցույթին մասնակցելու համար կրթության և գիտության նախարարություն երկու դիմում է ներկայացվել: Այդ պաշտոնին հավակնում են ռեկտորի ժամանակավոր պաշտոնակատար Գայանե Գասպարյանը և Վաղարշակ Մադոյանը: Երկուսն էլ դասավանդում են Լեզվաբանական համալսարանում: Մադոյանը նախկինում նաև «Անանիա Շիրակացի» համալսարանն է ղեկավարել:

«ՀԺ»–ն նշում է, որ Գայանե Գասպարյանից առաջ՝ այս բուհի ռեկտորի ժամանակավոր պաշտոնակատար էր նշանակվել համալսարանի իրավական, վարչական և տնտեսական աշխատանքների գծով պրոռեկտոր Գաբրիել Բալայանը: Եվ շատերն էին համոզված, որ հենց նա է լինելու ռեկտորը: Այդ պնդումները պայմանավորված էին, թերևս, այն հանգամանքով, որ պրոռեկտոր Բալայանի հայրը Սահմանադրական դատարանի անդամ Կիմ Բալայանն է: Նրա որդին, սակայն, չի համապատասխանում ռեկտորի թեկնածուին ներկայացվող պահանջներին, քանի որ ռեկտոր կարող է դառնալ գիտությունների դոկտոր-պրոֆեսորը, այնինչ՝ Գաբրիել Բալայանը իրավաբանական գիտությունների թեկնածու է: