AlJazeera. Ցուցարարները գրոհել են Քուվեյթի խորհրդարանը

Չորեքշաբթի երեկոյան, տասնյակ ցուցարարներ գրոհել են Քուվեյթի խորհրդարանի շենքը։ Ըստ ականատեսների՝ ցուցարարները պահանջել են երկրի վարչապետ շեյխ Մուհամադ Սաբահ Նասերի հրաժարականը։ Նախքան այս միջադեպը մի քանի հարյուր մարդ խորհրդարանի ետնամասում բողոքի ակցիա են անցկացրել կոռուպցիայի դեմ։

Ցուցարարներին հաջողվել է բացել խորհրդարանի գլխավոր մուտքի դռները և ներխուժել լսումների դահլիճ։ Խորհրդարանի դահլիճում ցուցարարները կարճ ժամանակ են անցկացրել և երգել են իրենց ազգային օրհներգը։ Խորհրդարանի շենքն ամբողջությամբ շրջապատել են ոստիկանության ուժերը։ Ցուցարարների և ոստիկանների միջև տեղի ունեցած մի քանի միջադեպերի պատճառով տուժել են մի քանի մարդիկ։ Քուվեյթն Արաբական ծոցի այն սակավաթիվ երկրներից է, որտեղ պատգամավորներն ընտրվում են ուղղակի քվեարկությամբ։ Ի տարբերություն Եգիպտոսի և Թունիսի՝ Քուվեյթում զանգվածային ցույցեր դեռևս չեն անցկացվում։ Ըստ միջազգային դիտորդների՝ դա վկայությունն է երկրում սոցիալ–տնտեսական պայմանների բարվոք վիճակի մասին։ Սակայն վերջին մի քանի ամիսների ընթացքում ընդդիմությունը մեծացրել է ճնշումները Քուվեյթի իշխանությունների վրա՝ բողոքելով երկրում աճող կոռուպցիայի դեմ։ Սակայն Քուվեյթի իշխանությունները սկսել են սահմանափակել քաղաքացիների ազատության իրավունքը։