Արցախյան հակամարտության կարգավորման հարցում Ֆրանսիայի դերակատարությունը

– Մեդվեդևի ձախողումից հետո Սարկոզին փորձում է դերակատարություն ստանձնել Արցախյան հակամարտության կարգավորման մեջ,- հոկտեմբերի տասին լրագրողների հետ հանդիպման ժամանակ հայտարարեց քաղաքական վերլուծաբան Երվանդ Բոզոյանը:

 Լիբանանում Հայաստանի նախկին դեսպան Արման Նավասարդյանն այսպես մեկնաբանեց.

– Ֆրանսիան ավելի լուրջ ու նուրբ քաղաքականություն է վարում: Եվ հնարավոր է, որ նրան հաջողվի այն, ինչը չհաջողվեց ամերիկացիներին և ռուսներին:

Այնուամենայնիվ Ե. Բոզոյանը հակամարտության արագ լուծումն անհնարին է համարում: 

- Արցախյան հակամարտության լուծման հարցը, երբ խոսում ենք գերտերությունների մասշտաբով, անկախ խաղացողների քանակից, միևնույն է մեկ կենտրոն ունի` դա Կրեմլն է,- համոզված է դիվանագետ Արման Նավասարդյանը:

Ֆրանսիայի դերակատարությունը Լիբիայում կարելի է հաջողված համարել։ Նա ակտիվ դերակատարություն է փորձում խաղալ նաև Սիրիայում. այնպես որ Արցախյան հակամարտությունում Ֆրանսիայի ակտիվանալու փորձերը պետք է բացատրել միայն Ֆրանսիայի արտաքին քաղաքականության ազդեցության ոլորտներն ավելի լայնացնելու խնդրով:

Երկու բանախոսներն էլ ավելորդ կանխատեսումներից խուսափում են, քանի որ ներկա քաղաքական դաշտում, ուր քաղաքական գործընթացները շատ արագ են փոխվում ու անսպասելի զարգացումներ են ունենում, սխալ է ինչ - որ ենթադրություններ անելը. պետք է սպասել ու գործել իրավիճակին համապատասխան: