Արամ Խաչատրյանի անվան 8-րդ միջազգային մրցույթ

Հունիսի 6-13-ը Երևանում կանցկացվի Արամ Խաչատրյանի անվան 8-րդ միջազգային մրցույթը: Այս տարի այն բաց կլինի «ջութակ» մասնագիտության համար: Նախագիծը կյանքի է կոչվում ՀՀ մշակույթի նախարարության, «Արամ Խաչատրյան-մրցույթ» մշակութային հիմնադրամի ու Կոմիտասի անվան Երևանի պետական կոնսերվատորիայի համատեղ ջանքերով և անցկացվում է ՀՀ նախագահի տիկին Ռիտա Սարգսյանի բարձր հովանու ներքո, որը հանդիսանում է մրցույթի հոգաբարձուների խորհրդի պատվավոր նախագահը:

2010 թվականից մրցույթի գլխավոր գործընկերն է ԱՊՀ անդամ երկրների հումանիտար համագործակցության միջպետական հիմնադրամը, որը հնարավոր դարձրեց նման լայնամասշտաբ ծրագրի իրականացումն առավել բարձր մակարդակով և մրցույթի տարածումն ԱՊՀ երկրներում:
Մրցույթի գործընկերն է Հայաստանի երիտասարդական հիմնադրամը։

Մրցույթի մասնակիցների աշխարհագրությունը շատ լայն է, այն ներառում է ներկայացուցիչներ աշխարհի շուրջ 20 երկրից՝ Ռուսաստանից, Ղազախստանից, Վրաստանից, Մոլդովայից, Ուկրաինայից, Բելառուսից, Լեհաստանից, Չինաստանից, Կորեայից, Կոլումբիայից, Իտալիայից, Իսպանիայից, ԱՄՆ-ից, Ճապոնիայից, Մեծ Բրիտանիայից, Ֆրանսիայից:

Մրցույթի հոգաբարձուների խորհրդի կազմի մեջ են ընդգրկված համաշխարհային հռչակ վայելող այնպիսի անուններ, ինչպիսիք են պրոֆեսոր Ջոնաթան Ֆրիման-Էթվուդը, պրոֆեսոր Ռեյնգարդ Ֆոն Գութզեյթը, Վալերի Գերգիևը, պրոֆեսոր Ալեքսանդր Սոկոլովը, պրոֆեսոր Ալեքսանդր Չայկովսկին, կոմպոզիտոր Ռոբերտ Ամիրխանյանը, Միխայիլ Շվիդկոյը, Պավել Կոգանը, Էլիժբիետա և Քշիշտոֆֆ Պենդերեցկիները, կոմպոզիտոր Էդուարդ Միրզոյանը, նշանավոր այլ անձինք:

Արամ Խաչատրյանի անվան միջազգային մրցույթի կազմկոմիտեն «ջութակ» մասնագիտության համար սահմանել է հետևյալ մրցանակները՝

1-ին մրցանակ՝ 15000 ԱՄՆ դոլար և դափնեկրի դիպլոմ
2-րդ մրցանակ՝ 10000 ԱՄՆ դոլար և դափնեկրի դիպլոմ
3-րդ մրցանակ՝ 5000 ԱՄՆ դոլար և դափնեկրի դիպլոմ

Արամ Խաչատրյանի անվան միջազգային մրցույթի եզրափակիչ փուլի մրցանակակիր չդարձած բոլոր մասնակիցները կպարգևատրվեն դիպլոմով և 2000 ԱՄՆ դոլար գումարով:

Այս տարի պատվավոր ժյուրիի կազմում կներառվեն՝
• Էդուարդ Թադևոսյանը (Հայաստան)՝ ժյուրիի նախագահ, Երևանի Կոմիտասի անվան պետական կոնսերվատորիայի պրոֆեսոր և նվագախմբային ֆակուլտետի դեկան,
• Բորիս Կուշնիրը (Ավստրիա)՝ Գրացի երաժշտության և կատարողական արվեստի համալսարանի և Վիեննայի կոնսերվատորիայի պրոֆեսոր,
• Հարոլդ Հերցլը (Ավստրիա)՝ Զալցբուրգի Մոցարտեում համալսարանի պրոֆեսոր և լարային ամբիոնի վարիչ,
• Իգոր Պետրուշևսկին (Մեծ Բրիտանիա)՝ Լոնդոնի թագավորական երաժշտական ակադեմիայի պրոֆեսոր,
• Կարեն Հարությունյանը (Բելգիա)՝ Բրյուսելի և Լյեժի թագավորական կոնսերվատորիաների պրոֆեսոր,
• Սերգեյ Կրավչենկոն (Ռուսաստան)՝ Մոսկվայի Չայկովսկու անվան պետական կոնսերվատորիայի լարային ամբիոնի վարիչ և պրոֆեսոր,
• Տանյա Դորնը (Գերմանիա)՝ IMG Artists Գերմանիայի, Հյուսիսային և Հարավային Ամերիկայի դիրիժորների և գործիքավորողների բաժնի համատնօրեն:

Մրցույթի շրջանակներում Երևան են ժամանելու այնպիսի պատվավոր հյուրեր, ինչպիսիք են՝
• Ալեքսանդր Սոկոլով (Ռուսաստան)՝ Մոսկվայի Պ.Չայկովսկու անվ. պետական կոնսերվատորիայի ռեկտոր,
• Գագիկ Գաբրիելյան (Ռուսաստան)՝ Մոսկվայում Արամ Խաչատրյանի անվան հիմնադրամի գործադիր տնօրեն,
• Էլժբիետա Պենդերեցկա (Լեհաստան)՝ «Լյուդվիգ վան Բեթհովեն» ասոցիացիայի նախագահ, Լյուդվիգ վան Բեթհովենի անվան Զատկի փառատոնի գլխավոր տնօրեն,
• Ժան Դիսլեր (Բելգիա)՝ մեկենաս,
• Ինո Միրկովիչ (Խորվաթիա)՝ ՅՈՒՆԵՍԿՕ-ի խաղաղության արտիստ, Լովրանում «Ինո Միրկովիչ» երաժշտական ակադեմիայի ռեկտոր, «Հարիսոն Փարրոթ» երաժշտական գործակալության խորհրդական,
• Մարկուս Մարշալը՝ I, Culture երաժշտական ծրագրի գեղարվեստական ղեկավար: