Բրիտանիայում նշում են Էլիզաբեթ 2-րդի գահակալության 60-ամյակը

Այսօր Մեծ Բրիտանիայում կանցկացվեն Էլիզաբեթ 2-րդ թագուհու գահակալության 60-ամյակին նվիրված տոնակատարություններ, որոնց կուլմինացիան հազարավոր նավերի երթն է Թեմզա գետով: Սպասվում է, որ թագավորական նավերով այդ երթին կհետևեն հարյուր հազարավոր մարդիկ: Նրանցից շատերը գիշերն անց են կացրել վրաններում՝ Թեմզայի ափին՝ չնայած տեղացող հորդառատ անձրևին: Երթը կտևի վեց ժամ և կավարտվի, երբ վերջին նավակը կհասնի Թաուերյան կամրջի մոտ:

Բացի նավերի երթից անգլիացիներն առաջիկա երեք օրերին կարող են մասնակցել նաև թագուհու գահակալության 60-ամյակի պատվին կազմակերպված երեկույթներին, բացօթյա համերգներին ու տոնավաճառներին:

Հոբելյանական միջոցառումների կազմակերպումը Անգլիային 10 միլիոն ֆունթ սթերլինգ է արժեցել, որը հիմնականում հավաքվել է մասնավոր նվիրաբերությունների հաշվին:

Էլիզաբեթ երկրորդը գահ է բարձրացել 1952 թվականի փետրվարի 6-ից, հոր' Գեորգ վեցերորդ թագավորի մահից հետո: