Մոսկվայում ձերբակալել են ուկրաինացի հայտնի քաղաքագետ Ալեքսանդր Սոլոնտային

Հայտնի ուկրաինացի քաղաքագետ Ալեքսանդր Սոլոնտային ձերբակալել են Մոսկվայի «Դոմոդեդովո» օդանավակայանում՝ առանց նշելու ձերբակալության պատճառները: Սոլոնտայը Մոսկվա էր ժամանել Մոսկվայի քաղաքացիական ակտիվսիտների համար դասախոսություն կարդալու նպատակով:

«Ալքսանդրը Մոսկվա է ժամանել «Սոլիդարնոստ» շարժման քաղխորհրդի ակտիվիստների համար Ուկրաինայում տիրող քաղաքական վիճակի մասին դասախոսություն կարդալու նպատակով: Նրան ձերբակալել են սահմանապահները՝ առանց որևէ պատճառ նշելու: Այժմ նա մեկուսարանում է»,- լրագրողների հետ զրույցում հայտնել է «Սոլիդարնոստ» շարժման անդամ Միխայիլ Շնեյդերը:

«Հանուն մարդու իրավունքների» շարժման առաջնորդ Լև Պոնոմարյովն էլ այս ձերբակալությունն «անօրինական» է որակել ու հայտնել է, որ դեպքի առթիվ արդեն դիմել է դատախազություն:

«Հավանաբար, սա հատուկ ծառայությունների աշխատանքն է: Ամենայն հավանականությամբ, Սոլոնտայն այն անձանց ցուցակում է, որոնց ներկայությունը Ռուսաստանում ցանկալի չէ»,- իրավապաշտպանի խոսքերը մեջբերում է «Ինտերֆաքս» գործակալությունը: