Նյու-Յորքում կառուցվող համաշխարհային առևտրային կենտրոնի շենքում հրդեհ է բռնկվել

Հրդեհ է բռնկվել համաշխարհային առևտրային կենտրոնի շենքում, որը կառուցվում է Նյու-Յորքում 2001–ի սեպտեմբերի 11–ի ահաբեկչության պատճառով փլուզված «Երկվորյակ աշտարակների» տեղում, հաղորդում է Associated Press–ը։

Հրդեհը բռնկվել է 89, 90 և 91 հարկերում։ Սկզբում հրդեհը կրակմարիչներով փորձել են մարել շինարարները, որոնց քիչ անց օգնության են հասել հրշեջները։ 

Հրշեջներին հաջողվել է հրդեհը մարել ավելի քան 1 ժամ անց։ Հրդեհի հետևանքով տուժածներ չկան, իսկ կառույցի կոնստրուկցիաները չեն վնասվել։ Հրդեհի պատճառների մասին տեղեկություններ չեն հաղորդվում։ Հայտնի է միայն, որ այրվել է շինարարական նպատակներով օգտագործվող փայտանյութը։ 

Համաշխարհային առևտրային 1–ին կենտրոնը հայտնի է «Ազատության աշտարակ» (Freedom Tower) անունով։ Կենտրոնի կառուցման աշխատանքները սկսվել են 2006–ի ապրիլին։ Այս պահին երկնաքերի բարձրությունը հասնում է ավելի քան 380 մետրի։ Կառույցի բարձրությունը նախատեսված է հասցնել մինչև 541 մետրի։ «Ազատության աշտարակը» արդեն դարձել է Նյու-Յորքի ամենաբարձր կառույցը։ Առևտրային կենտրոնի կառուցման աշխատանքները կավարտվեն 2014–ին։ 

Համաշխարհային առևտրային կենտրոնի համալիր շենքերը, այդ թվում՝ «Երկվորյակ աշտարակները», փլուզվել են 2001–ի սեպտեմբերի 11–ին տեղի ունեցած ահաբեկչության հետևանքով։