«Հայաստանն առանց աղբի» կավճանկարչության մրցույթ

Մենք կարող ենք (Let’s do it! Armenia) շարժումը հաղորդագրություն է տարածել՝ հայտարարելով, որ հունիսի 5-ին՝ ժ. 17.00-19.00, ՀՀ մի շարք քաղաքներում և գյուղերում կազմակերպվելու է Շրջակա միջավայրի համաշխարհային օրվան նվիրված՝ «Հայաստանն առանց աղբի» կարգախոսով կավճանկարչության մրցույթ: Հաղորդագրության մեջ մասնավորապես ասվում է.

«2012թ.-ին հունիսի 3-8 ամբողջ աշխարհում նախատեսվում է իրականացնել ավելի քան 8000 միջոցառում նվիրված Շրջակա միջավայրի համաշխարհային օրվանը, որի թեման է «Կանաչ տնտեսությունը»: Այս կավճանկարչության ֆլեշմոբ տարբերակով իրականացվող միջոցառումը ներառված է Շրջակա միջավայրի համաշխարհային օրվան նվիրված միջոցառումների ցանկում:
Մասնակից երեխաները միասին նկարելու են մեր մաքուր շրջակա միջավայրը՝ մաքուր բակը, այգին, անտառը, քաղաքը, երկիրը: Միջոցառման ընթացքում մասնակիցներին ներկայացվելու է օրվա խորհուրդը՝ արժևորել և պահպանել իրենց շրջակա միջավայրը: Երեխաներին հանրամատչելի ձևով կներկայացվի աղբի տեսակավորման և վերամշակման մասին տեղեկատվություն:
«Մենք կարող ենք» (Let’s do it! Armenia) շարժման մասնակից մի շարք կազմակերպությունները նախատեսել են բազմաթիվ մրցանակներ:
Միջոցառումը իրականացվում է «Մենք կարող ենք» (Let’s do it! Armenia) «Հայաստանն առանց աղբի» շարժման շրջանակներում, ի շնորհիվ շարժման մաս կազմող հետևյալ կազմակերպությունների աջակցության՝ Երիտասարդ կենսաբանների ասոցիացիա ՀԿ, Բնության համաշխարհային հիմնադրամը (WWF-Հայաստան), Հայաստանի ծառատունկ ծրագիրը (ATP), Երևանի, Ապարանի, Հրազդանի, Իջևանի, Գավառի, Ալավերդու, Եղվարդի Օրհուս կենտրոններ, «Տապան» էկո-ակումբ ՀԿ, Հայկական բնապահպանական ցանցը, «Եղվարդ» երիտասարդական-բնապահպանական ՀԿ, DJ Vakcina-ն (The Laboratory), Կանաչաստան ՀԿ, Երիտասարդ ժուռնալիստների ասոցիացիա ՀԿ, «Հայաստանի թռչունների պահպանման միություն» ՀԿ, Սպառողների աջակցման կենտրոն ՀԿ, Armyouth.am կայքը, Օհանյան քոլեջ և այլն:

Սիրով հրավիրում ենք Ձեզ լուսաբանելու այս միջոցառումը և աջակցել «Մենք կարող ենք» (Let’s do it! Armenia) կամավորական բնապահպանական շարժման մասին հասարկության տեղեկացվածության մակարդակի բարձրացմանը:

Կավճանկարչության մրցույթը տեղի է ունենալու հետևյալ վայրերում՝

1. ք. Երևան - Մանկական զբոսայգի /նախկին Կիրովի այգի/:
2. ք. Հրազդան - թիվ 4 դպրոցի բակ
3. ք. Ալավերդի - Սանահին սարահարթ թաղամաս 2/29Ա, թիվ 6 մանկապարտեզի բակ)
4. գ. Աքորի դպրոցի բակ
5. գ. Հաղպատի դպրոցի բակ
6. ք. Եղվարդ - փ. Երևանյան 7Բ, Եղվարդի թիվ 3 հիմնական դպրոցի բակ
7. ք. Իջևան - փ. Աշոտ Մելիքբեկյան, Մշակույթի տան հարևանությամբ
8. ք. Գավառ - Գավառի հրապարակ / Մ. Աստվածածնի եկեղեցու հարևանությամբ/
9. ք. Ապարան - փ. Գարեգին Նժդեհի 2, Ապարանի ավագ դպրոցի բակ»։