Քլինթոնի այցի օրն ադրբեջանական դիվերսիան պատահական չէր. փորձագետ

Այսօր՝ հունիսի 4-ին, Lurer.com-ը ԱՄՆ պետքարտուղար Հիլարի Քլինթոնի այցի կապակցությամբ զրուցել է միջազգայնագետ, Քաղաքական և միջազգային հետազոտությունների հայկական կենտրոնի փորձագետ Ռուբեն Մեհրաբյանի հետ, որն անդրադարձել է Քլինթոնի այցին հաջորդող հետագա հնարավոր զարգացումներին, ինչպես նաև մեկնաբանել Ադրբեջանի կողմից հրադադարի խախտման տրամաբանությունը: 

 Փորձագետի կարծիքով պետքարտուղարի այցը տարածաշրջան վկայում է տարածաշրջանի կարևորության մասին, կա այն ընկալումը, որ այսօր տարածաշրջանը հարաբերական խաղաղության պայմաններում է, սակայն ձգձգված հակամարտություններով հանդերձ կարող է մեծ վտանգ ներկայացնել:

Եթե մինչ այժմ Ռուսաստանն էր ընկալվում այս տարածաշրջանի անվտանգության երաշխավորը, որի շնորհիվ այստեղ ակնկալվում էր կայունություն, ապա այժմ, դրական տեղաշարժ չտեսնելով՝ ամերիկացիները կարող են պատասխանատվություն ստանձնել այս տարածաշրջանում` աշխուժացնելով տեղի ունեցող բանակցային գործընթացները` թե՛ Ղարաբաղյան հիմախնդրի լուծումը, թե՛ հայ-թուրքական հարաբերությունների հաստատումը և թե՛ Վրաստանի երկու սառած հակամարտությունների կարգավորումը:

Միջազգայնագետը պատահական չի համարում նաև պետքարտուղարի այցի օրը կազմակերպված ադրբեջանական դիվերսիան:

«Դիվերսիան միտումնավոր էր կազմակերպված` փորձելով բանակցային գործընթացում ԱՄՆ-ին պարտադրել Հայաստանի վրա ճնշում գործադրել, սակայն Ադրբեջանի մարտավարությունը լիովին սխալ է և հակազդեցության կարժանանա միայն այն դեպքում, երբ ՀՀ-ն պահանջատեր և հետևողական գտնվի ու հրաժարվի ռեֆլեքսի դիվանագիտության իր որդեգրած ուղուց», -նշեց Ռուբեն Մեհրաբյանը` ավելացնելով, որ Ադրբեջանի կողմից պարբերական հրադադարի խախտումները միայն բացասաբար կանդրադառնան Ադրբեջան-ՆԱՏՕ հարաբերությունների վրա, չնայած որ այդպիսիք մասնավորապես տեսանելի չեն` հաշվի առնելով Ռուսաստանի առկայությունը:

Իրավիճակը կրկին անգամ ապացուցեց, որ Ադրբեջանը, չլինելով որևէ մեկի «աչքի լույսը», ներկայանում է որպես մարդու իրավունքների խախտող երկիր և իր ժողովրդավարությամբ դասվում աֆրիկյան երկրների շարքին: