Նիգերիայում վթարի ենթարկված օդանավի 2 շարժիչներն էլ անսարք վիճակում են եղել

Հունիսի 3-ին Նիգերիայում վթարի ենթարկված ինքնաթիռի երկու շարժիչներն էլ անսարք վիճակում են եղել, հայտնել է Ֆրանս Պրես գործակալությունը՝ հղում անելով այդ երկրի քաղավիացիայի վարչության ղեկավար Հարոլդ Դեմուրենի հայտարարությանը։

«Նրանք (անձնակազմը) ահազանգել են, քանի որ երկու շարժիչների աշխատանքը խափանվել է»,- բացատրել է նա՝ չմանրամասնելով անսարքության պատճառները։

Հիշեցնենք, որ նիգերիական Dana Air ավիաընկերությանը պատկանող Boeing MD-83 ինքնաթիռը, որն ուղևորներ էր փոխադրում Աբուջայից Լագոս, ընկել էր Լագոս քաղաքի օդանավակայանի հյուսիսում գտնվող խիտ բնակեցված թաղամասի տարածքում։ Երկրի իշխանությունները հաստատել են, որ ինքնաթիռում եղել է 153 մարդ, այդ թվում՝ 6 հոգանոց անձնակազմը։ Ավիավթարի վայրում իրականացվում են փրկարարական աշխատանքներ, սակայն փրկվածներ դեռևս չկան։