«Ժողովուրդ». Սերժ Սարգսյանի խոստումներից ևս մեկը անդարձ հետաձգվեց

Սերժ Սարգսյանի հովանու ներքո «ԵՊՀ շրջանավարտների միավորում» ՀԿ-ի կողմից իրականացվող «Աջակցություն երիտասարդ ընտանիքների բնակարանաշինությանը» ծրագիրը Կապանում գրեթե ձախողվել է: Այն մեկնարկել է 2010–ի հոկտեմբերի 15-ին: Ըստ ցուցապաստառի՝ այն պիտի շահագործման հանձնվի 2012–ի նոյեմբերի 30-ին: Սակայն մինչ օրս ոչ միայն հերթագրված ընտանիքների վիճակահանությունը չի կատարվել, այլև անգամ շինաշխատանքները չեն սկսվել: «Ժողովուրդ»-ի տեղեկություններով՝ շահառու ընտանիքներն արդեն հրաժարվում են ծրագրից, մի քանիսը նույնիսկ հիփոթեքով տուն են գնել:

Թերթը հիշեցնում է, որ ըստ ծրսսգրի՝ համալիրը պետք է ունենար 3 բնակելի շենք՝ 335 բնակարանով:

«ԵՊՀ շրջանավարտների միավորման» նախագահ, ՀՀ սպորտի և երիտասարդության փոխնախարար Արսեն Քարամյանը, որը ոգևորված հայտարարում էր երիտասարդ ընտանիքների «փրկության» մասին, երեկ կմկմալով ասել է. «Հողահատկացումից հետո պարզ դարձավ, որ ստորգետնյա ջրերի մեծ հոսք կա հիշյալ տարածքում, և ձեռնամուխ եղանք մոտ 78 միլիոն դրամի ջրահեռացման աշխատանքներին: Դա կատարվել է, և ներկայում շինարարը ձեռնամուխ է եղել հիմքերի կառուցման աշխատանքին: 7-8 ամիս ջրահեռացման պատճառով աշխատանքները հետ են ընկել»:

Քարամյանը նշել է, որ կառուցումը մեկ տարով կհետաձգվի: Այսպիսով՝ ՀՀԿ առաջնորդ Սերժ Սարգսյանի խոստումներից ևս մեկը անդարձ հետաձգվեց: