Պետական և մասնավոր բուհերը իրավահավասար են. Արթուր Աղաբաբյան

Այս տարի միասնական քննություններին մասնակցում են նաև մասնավոր բուհեր հայտ ներկայացրած դիմորդները: Այս մասին այսօր լրագրողների հետ հանդիպմանն ասաց Մովսես Խորենացու անվան համալսարանի ռեկտոր Արթուր Աղաբաբյան։

Նա նշեց, որ մասնավոր բուհերի մասնակցության համակարգը նոր-նոր է ներդրվում, և այս հանգամանքը մի փոքր բարդացրել է մասնավոր բուհերի վիճակը՝ ուսանողների թվի հետ կապված:

Ռեկտորի խոսքերով, եթե նախկինում դիմորդները միասնական քննություններից կտրվելուց հետո կարող էին օգոստոսին մասնակցել մասնավոր բուհի քննություններին, ապա այսօր նման հնարավորություն չկա:

«Բոլոր քննությունները կազմակերպում է Գիտության թեստավորման կենտրոնը, բայց խոսքը չի վերաբերում հեռակա ուսուցմանը»,-ասաց նա:

Արթուր Աղաբաբյանը նաև տեղեկացրեց, որ այս տարի առաջին հայտով բուհ է դիմել 25 դիմորդ, որոնցից 12-ը նախընտրել են ինֆորմատիկա և կիրառական մաթեմատիկայի բաժինները: Ըստ նրա, ինչպես պետական, այնպես էլ մասնավոր ուսումնական հաստատություններում այսօր առավել մեծ պահանջարկ են վայելում Իրավագիտությունը, Ինֆորմատիկան և Կիրառական մաթեմատիկան:

Բանախոսը նշեց, որ շատ հաճախ մարդիկ նպատակահարմար են գտնում իրենց կրթությունը կազմակերպել 80 տարվա պատմություն ունեցող պետական բուհերում.

«Շատերը հաճախ ասում են, թե ինչպե՞ս կարող են իրար հետ համեմատվել 80 տարեկան և 10 տարեկան բուհերը, բայց եթե 10 տարեկան բուհում դասավանդում են 80 տարեկան մասնագետները, տարբերությունը ո՞րն է»,– ասաց նա։

Աղաբաբյանը նշեց նաև, որ պետական և մասնավոր բուհերը իրավահավասար են։ Նրա խոսքերով մասնավոր բուհ ավարտած ոչ մի ուսանող աշխատանք փնտրելիս որևէ դժվարության չի հանդիպի: