Գրքի տոնին 30-40 հայ գրողներ այդպես էլ դրսում մնացին

«Անընդհատ խոսվում է գրքի շուրջ, բայց ոչ գրքի մասին, կա գրքի արձան, գրքի տոն, գրքի տաշի-տուշի, գրքի համերգ, բայց չկա գիրք»,-անդրադառնալով վերջերս Երևանում անցկացվող գրքին նվիրված միջոցառումներին՝ այսօր ասաց գրահրատարակիչ Արմեն Մարտիրոսյանը։

Գրքին նվիրված միջոցառումներից դժգոհ էին նաև մյուս բանախոսները՝ գրող Կարեն Անտաշյանը, գրաքննադատ Հասմիկ Հակոբյանը և գրականագետ Արքմենիկ Նիկողոսյանը։ Հասմիկ Հակոբյանն ասաց, որ միջոցառումները բոլորի համար էին, բացի մշակույթի գործիչներից և գրողներից, և ոչնչով չնպաստեցին գրականությանը, պարզապես էլի գումարներ էին ծախսվել ինչ-որ մարդկանց ինչ-որ բան ապացուցելու կամ ցուցադրելու համար։

Արքմենիկ Նիկողոսյանի համար ամենազարհուրելին գրքին նվիրված միջոցառումների ժամանակ գրողներին դրսում թողնելն էր։ «Պատճառաբանում էին, որ միջոցառումը հատուկ հյուրերի համար է, և 30-40 հայ գրողներ այդպես էլ դրսում մնացին, իսկ «Արմէքսպոն» լուսաբանելու եկած լրագրողներն այդ ուղղությամբ որևէ քայլ չարեցին։ Նրանք մուտքի մոտ հավաքված սպասում էին բարձրաստիճան պաշտոնյաների դուրս գալուն ու նրանց հետ էլ հեռացան՝ ըստ էության ոչ մի բան չգրելով «Արմէքսպո»-ի մասին»,- ասաց գրականագետը։

Իսկ բանաստեղծ կարեն Անտաշյանն ասաց. «Առաջ կարող էինք խոսել պետության անտարբերության մասին, բայց այսօր միջոցներ հատկացվում են, միայն թե հարց է՝ արդյո՞ք արդյունավետ են մեխանիզմները, որոնցով պետությունը մասնակցում է գրական գործի կազմակերպմանը, և արդյո՞ք միջոցները արդյունավետ են ծախսվում։ Պետությունը պետք է նպաստավոր միջավայր ստեղծի, որ մշակույթի վրա ծախսվող գումարներն այդ մշակույթն արարողներին հասնեն»։