ԱՄՆ-ը կսատարի Սերժ Սարգսյանին, եթե նա շարունակի Հիլարի Քլինթոնի վարած քաղաքական գիծը. Ստյոպա Սաֆարյան

Քլինթոնի այցի նպատակը տարածաշրջանում ամերիկյան ներկայության մեծացումն է, ինչի հետ կապված Միացյալ նահանգները առաջարկ են կատարում Հայաստանին՝ ավելի ընդլայնելու այդ հարաբերությունները։ Այդ  մասին Լուրեր.com-ի հետ զրուցում հայտնեց «Ժառանգություն» կուսակցության վարչության քարտուղար Ստյոպա Սաֆարյանը՝ մեկնաբանելով ԱՄՆ պետքարտուղար Հիլարի Քլինթոնի այցը Հայաստան։

Այցը, որի ընթացքում անդրադարձ է կատարվել այնպիսի կարևորագույն խնդիրների, ինչպես՝ հայ–թուրքական հարաբերությունները և ԼՂՀ հիմնահարցը, ըստ Սաֆարյանի՝ լուրջ վտանգներ է պարունակում։

«Ամերիկյան կողմը առաջարկում է պաշտպանել հայ–թուրքական արձանագրությունների քաղաքականությունը, մինչդեռ հայկական կողմը լուրջ վերանայումների կարիք ունի», – պարզաբանեց նա։ 

Երկրորդ վտանգը, որ տեսնում է Սաֆարյանը, ղարաբաղյան կոնֆլիկտին է վերաբերում. մադրիդյան փաստաթուղթը և դրա հիմքում ընկած սկզբունքերը նորից «սեղանին դնելը»։

Անդրադառնալով ԱՄՆ պետքարտուղարի և Հայաստանի արտգործնախարարի հայտարարությունների հակասությանը հայ–թուրքական սահմանի բացման մասով՝ «Ժառանգության» ներկայացուցիչը նշեց, որ «արձանագրությունների վերանայման բանակցույթունների հետ կապված արտգործնախարարի մերժողական վերաբերմունքը ճիշտ չէ»։

«Բանակցությունները վերաբերում են արձանագրություններին, որովհետև Քլինթոնը կարծում է, որ Հայաստանն իր գործը կատարել է, պաշտոնական Երևանն էլ ասում է, որ ցանկություն չունի բանակցությունների մեջ մտնելու։ Բայց սա մի իրավիճակ է ստեղծում, երբ սեղանի վրա ունենք նույն այդ արձանգրությունները, որոնք գոհացնում են ամերիկյան կողմին և կարող են հիմք հանդիսանալ, որ նա ճնշումներ գործադրի Անկարայի վրա դրանք վավերացնելու ուղղությամբ։ Հաստատ այդ իրավիճակը Հայաստանին լավ բան չի խոստանում». – հավելեց նա։

Մյուս կողմից, ըստ Սաֆարյանի, «սա նախգահական ընտրությունների նախաշեմին կատարված այց է, որով ուզում են հասկանալ, թե ինչի՞ է պատրաստ Հայաստանի իշխանությունը, և ի՞նչ առաջարկներ կարող են ընդունել և մերժել»։ «Նաև չմոռանանք, որ կա Սիրիայի և Իրանի խնդիր, և այստեղ կարևոր է Հայաստանի, եթե ոչ աջակցությունը, ապա՝ գոնե չեզոքությունն առաջիկայում ձեռնարկելիք քայլերի, պատժամիջոցների, սանկցիաների կապակցությամբ», – նշեց նա՝ համոզմունք հայտնելով, որ Սարգսյան–Քլինթոն առանձնազրույցի չհրապարակված մասը վերաբերում է հենց դրան։

Իսկ Քլինթոնի հայտարարության առնչությամբ, թե «ԱՄՆ–ն պատրաստակամ է օժանդակել և աջակցել ձեր (Սերժ Սարգսյանի) շարունակական գործունեությանը՝ որպես հիանալի առաջնորդ», Սաֆարյանը կարծիք հայտնեց, որ դա ակնարկ է եղել, որ Միացյալ նահանգները կսատարեն Սարգսյանի թեկնածությանը առաջիկա նախագահական ընտրություններում, եթե «նրա վարած քաղաքականությունը մնա Հիլարի Քլինթոնի ցանկալի գծի վրա»։ 

Ռուսաստանից սպասվելիք արձագանքներին անդրադառնալով՝ «Ժառանգության» վարչության նորանշանակ քարտուղարը տեսակետ հայտնեց, որ «Ռուսաստանի նախագահը հստակ ծրագիր ունի հետսովետական տարածաշրջանի հետ կապված՝ ի դեմս Եվրասիական միության ստեղծման, ռուսական ազդեցության գոտիների պահպանման և վերականգնման»։ Այստեղից նա հետևություն է անում, որ այս շրջանում Սերժ Սարգսյանին բավականին դժվար կլինի բավարարարել երկու տերությունների ակնկալիքները։