Թուրքիան ԱՄՆ-ի ճնշման ներքո նվազեցնում է Իրանից նավթի ներկրումը

Թուրքիան զգալիորեն կրճատել է մայիս ամսին Իրանից ներկրվող նավթի ծավալները և պատրաստվում է շարունակել այն նվազեցնել նաև հունիսին ԱՄՆ-ի կողմից պատժամիջոցներից խուսափելու համար։ Այս մասին հայտնում է Reuters գործակալությունը՝ հղում անելով երկրի միակ Tupras նավթավերմշակող ընկերության անանուն աղբյուրին։

Մարտի վերջին Tupras-ը հայտարարել էր, որ պատրաստվում է 20%-ով կրճատել Իրանից նավթի ներկրման ծավալները, սակայն ապրիլին գնել է նույնքան նավթ, որքան առաջ։ Անկարան Իրանի նավթի 5-րդ խոշորագույն գնորդն է, իսկ նշյալ ընկերությունն ունի պայմանագիրմ, որով կարող է իսլամական հանրապետությունից օրական գնել 180000 բարել նավթահումք։

Մարտ ամսին այն, սակայն, գնել է օրական 270000 բարել, իսկ ապրիլին՝ 249000։ Աղբյուրի տվյալներով, մարտին ներմուծումը կազմել է 142000 բարել օրական. հունիսին այդ ծավալները կպահպանվեն։

Նշենք, որ հուլիսի մեկին ԵՄ-ում ուժի մեջ է մտնում Իրանից նավթի արտահանման վար էմբարգոն, ինչի հետևանքով եվրոպական երկրները ևս կրճատում են իրենց ներմուծումը։

Իսլամական հանրապետությունը կորցնում է իր շուկաները ԱՄՆ-ի գործողությունների հետևանքով, քանի որ վերջինս իր գործընկերներին և այլն երկրների պարտադրում է նվազեցնել Թեհրանից նավթի գնումը՝ սպառնալով պատժամիջոցներով։ Այդ իրադրության մեջ են հայտնվել Ճապոնիան, Հնդկաստանը, Չինաստանը և Հարավային Կորեան։

ԵՄ-ն և ԱՄՆ-ը Իրանի հանդեպ նոր պատժամիջոցներ են կիրառել ատոմական զենքի մշակման հարցում երկրի հանդեպ ունեցած կասկածների պաճառով։ Իրանը հայտարարել է, որ նման հետազոտություններ տարվում են բացառապես էլեկտրաէներգիայի արտադրության ոլորտի բարելավման համար։