Հայաստանի հնարավորությունները՝ իտալական ընկերությունների համար

Մայիսի 22-ից 25-ը «ԻնֆոԱրմենիա» ընկերության հրավերով Իտալիայում էր ՀՀ էկոնոմիկայի նախարարի տեղակալ Տիգրան Հարությունյանի գլխավորած պատվիրակությունը` Վենետիկի Մուրադ-Ռաֆայելյան վարժարանում կայանալիք «Հայաստանի հնարավորությունները իտալական ընկերությունների համար» խորագրով համաժողովին մասնակցելու նպատակով:

Պատվիրակության կազմում էին ՀՀ էկոնոմիկայի նախարարության արդյունաբերության քաղաքականության վարչության պետ Հայկ Միրզոյանը և «Զարգացման Հայկական Գործակալություն» ՓԲԸ-ի գլխավոր տնօրեն Ռոբերտ Հարությունյանը:

Համաժողովի նպատակն էր բացահայտել Իտալական ընկերությունների հետ համագործակցության, մասնավորապես` նրանց կողմից Հայաստանի Հանրապետության տնտեսության մեջ ներդրումներ կատարելու հնարավորությունները: Համաժողովին մասնակցում էին Վենետիկի կառավարության, գործարար շրջանակների, ինչպես նաև հայկական սփյուռքի ներկայացուցիչներ: Այցի շրջանակներում պատվիրակությունը մի շարք հանդիպումներ ունեցավ Վենետիկ քաղաքի իշխանության ներկայացուցիչների, գործարարների, ինչպես նաև հայկական համայնքի հետ:

Համաժողովի ընթացքում ՀՀ պատվիրակության անդամները հանդես եկան ելույթներով և իտալացի գործարարներին ներկայացրին Հայաստանի գործարար և ներդրումային միջավայրը, ազատ տնտեսական գոտիների հնարավորությունները, Հայաստանի արդյունաբերության հիմնական ճյուղերը և դրանցում ներդրումներ կատարելու հնարավորությունները, ինչպես նաև արտահանման վրա հիմնված արդյունաբերական քաղաքականության հիմնական դրույթները:

Համաժողովի ավարտին որոշվեց, որ ս.թ. սեպտեմբերին կկազմակերպվի իտալացի գործարարների այցը Հայաստանի Հանրապետություն` տեղում ծանոթանալու Հայաստանի տնտեսության մեջ ներդրումներ կատարելու հնարավորություններին և հանդիպելու համապատասխան ոլորտների ընկերությունների ներկայացուցիչների հետ:

Հայաստանի պատվիրակության անդամները Վենետիկում մասնակցեցին նաև «Զարգացման Հայկական Գործակալություն» ՓԲԸ-ի նոր ներկայացուցչական գրասենյակի հանդիսավոր բացմանը: