Մեկնարկում է Արամ Խաչատրյանի անվան 8-րդ միջազգային մրցույթը

Սույն թվականի հունիսի 6-13-ը Երևանում կանցկացվի Արամ Խաչատրյանի անվան 8-րդ միջազգային մրցույթը: Այս տարի այն կընթանա «ջութակ» անվանակարգում:

Մրցույթն անց է կացվում Հայաստանի Հանրապետության նախագահի տիկին Ռիտա Սարգսյանի հովանավորությամբ, ով հանդիսանում է մրցույթի հոգաբարձուների խորհրդի պատվավոր նախագահը:

Մրցույթի կազմակերպիչներն են' ՀՀ Մշակույթի նախարարությունը, «Արամ Խաչատրյան մրցույթ» մշակութային հիմնադրամը և Երևանի Կոմիտասի անվան պետական կոնսերվատորիան: 2010 թվականից մրցույթի գլխավոր գործընկերն է ԱՊՀ անդամ պետությունների հումանիտար համագործակցության միջպետական հիմնադրամը:

Մասնակիցների աշխարհագրությունը ներառում է ներկայացուցիչներ աշխարհի շուրջ 20 երկրից' Ռուսաստանից, Ղազախստանից, Վրաստանից, Մոլդովայից, Ուկրաինայից, Բելառուսից, Լեհաստանից, Չինաստանից, Կորեայից, Կոլումբիայից, Իտալիայից, Իսպանիայից, ԱՄՆ-ից, Ճապոնիայից, Մեծ Բրիտանիայից, Ֆրանսիայից:

Մրցույթի հոգաբարձուների խորհրդի կազմում են ընդգրկված համաշխարհային հռչակ վայելող դեմքեր՝ պրոֆեսոր Ջոնաթան Ֆրիման-Էթվուդը, պրոֆեսոր Ռեյնգարդ Ֆոն Գութզեյթը, Վալերի Գերգիևը, պրոֆեսոր Ալեքսանդր Սոկոլովը, պրոֆեսոր Ալեքսանդր Չայկովսկին, կոմպոզիտոր Ռոբերտ Ամիրխանյանը, Միխայիլ Շվիդկոյը, Պավել Կոգանը, Էլիժբիետա և Քշիշտոֆ Պենդերեցկիները, կոմպոզիտոր Էդուարդ Միրզոյանը, այլ նշանավոր անձինք: