«Թանգարանների գիշերվա» այցելություններն այս տարի 31052-ով ավելին են եղել, քան նախորդ տարի

Ընդունված կարգի համաձայն, այս տարի ևս «Թանգարանների գիշեր» միջոցառումն /մայիսի 19/ հաջորդել է Թանգարանների միջազգային օրվան՝ մայիսի 18-ին, թանգարանասեր հանրությանը պարգևելով երկօրյա տոն:

Հիշեցնենք, որ մեր երկրում «Թանգարանների գիշեր» ակցիան անցկացվել է «Գիրը փոփոխվող աշխարհում» կարգախոսով՝ նվիրված Հայ գրատպության 500-ամյակին և Երևանը ՅՈՒՆԵՍԿՕ-ի կողմից գրքի 2012 թ. համաշխարհային մայրաքաղաք հռչակվելուն:
Այսպիսով ամփոփելով հասարակության երկօրյա մուտքը հանրապետության թանգարաններ, արձանագրում ենք.

Թանգարանների միջազգային օրը՝ մայիսի 18-ին, Հայաստանի թանգարաններ են այցելել 14398 այցելու, իսկ «Թանգարանների գիշեր» ակցիային մասնակցել է 134436 այցելու: Ընդհանուրը՝ 148834 այցելու:

Նախորդ՝ 2011 թ. նույն օրերին՝ համապատասխանաբար Թանգարանների միջազգային օրվա այցելությունների թիվն է 10690, իսկ «Թանգարանների գիշեր» ակցիայինը՝ 107092, ընդհանուրը՝ 117782 այցելու: