Իտալիայում երկրաշարժի զոհերի թիվը հասել է 26-ի

Ըստ վերջին տվյալների՝ Իտալիայում տեղի ունեցած երկրաշարժի զոհ է դարձել 26 մարդ:

Հունիսի 5-ի երեկոյան Մոդենա քաղաքի հիվանդանոցում վախճանվել էր մի կին, որին մեկ շաբաթ առաջ փրկարարները հանել էին Կավեցո գյուղի բնակելի տան փլատակների տակից: Այնտեղ տուժածն անցկացրել էր 12 ժամ: Ավելի վաղ հայտնի էր դարձել, որ Բոլոնիայի հիվանդանոցում վախճանվել է մեկ այլ կին:

Ծանր վիճակում է գտնվում նաև մի տղամարդ: Նա լուրջ վնասվածքներ էր ստացել 7 օր առաջ, հայտնում է «Ռոսբալտը»:

Հիշեցնենք, որ մայիսի 20-ին եւ 29-ին իտալական Էմիլիա Ռոմանյա շրջանում տեղի է ունեցել երկու ավերիչ երկրաշարժ՝ 6,0 եւ 5,8 բալ ուժգնությամբ։ Առաջին երկրաշարժը խլել էր 7 մարդու կյանք, երկրորդի ժամանակ զոհվածների թիվը հասել էր 19-ի:

Ընդհանուր առմամբ 400 մարդ է վիրավորվել եւ շուրջ 15 հազարը՝ մնացել անօթևան։ Շրջանի տնտեսությանը հասցված վնասը գնահատվում է 5 միլիարդ եվրո:

Ընդ որում, ստորերկրյա ցնցումներն Իտալիայի հյուսիսում չեն դադարում մինչ այժմ: Անցած 16 օրվա ընթցաքում գրանցվել է 638 երկրաշարժ: