Քլինթոնի հետ առաջնային քնարկման թեման լինելու է Արցախյան հիմնախնդրի կարգավորումը. Մամեդյարով

1news.az-ի փոխանցմամբ` ԱՄՆ պետքարտուղար Քլինթոնը տարածաշրջանային այցերի շրջանակում այսօր ժամանելու է Բաքու: 

Պաշտոնական այցի շրջանակներում նախատեսվում է պետքարտուղարի հանդիպումը Ադրբեջանի նախագահ Իլհամ Ալիևի արտգործնախարար Էլմար Մամեդյարովի, ինչպես նաև քաղաքացիական հասարակության ներկայացուցիչների և լրագրողների հետ:

Ինչպես նախապես հայտնել է Բաքվում ԱՄՆ-ի դեսպանատունը, հանդիպումների շրջանակներում քննարկվելու են երկու երկրների միջև տնտեսական և էներգետիկ համագործակցությունը, քաղաքական երկխոսության ամրապնդումը, ինչպես նաև տարածաշրջանային անվտանգությանը վերաբերող այլ հարցեր:

Մամեդյարովի խոսքերով, Քլինթոնի հետ առաջնային կարևորության քնարկման թեմա է լինելու Արցախյան հիմնախնդրի կարգավորումը:

«Մենք մտադիր ենք ուղիներ փնտրել հիմնախնդիրը կարգավորելու համար, սակայն մեզ համար անհասկանալի է հայկական կողմի տրամաբանությունը», - նախօրեին ասել է արտգործնախարարը: Այցի շրջանակներում պետքարտուղարը ներկա կգտնվի նաև Կասպից նավթագազային 19-րդ ցուցահանդեսին:

Հիշեցնենք, որ պետքարտուղարը Բաքու ժամանելուց առաջ այցելել էր Հայաստան և Վրաստան, իսկ տարածաշրջանային այցը կավարտի հունիսի 7-ին Ստամբուլում, որտեղ թուրքական կողմի հետ կքննարկի միջազգային խնդիրներ, մասնավորապես՝ իրավիճակը Սիրիայում և միջուկային ծրագիրը՝ Իրանում:

Հունիսի 7-ին պետքարտուղարը Թուրքիայում կմասնակցի նաև Գլոբալ ֆորումին, որում կքննարկվի համաշխարհային ահաբեկչության դեմ պայքարը: