Տավուշի մարզի գյուղերում իրավիճակը հանգիստ է. գիշերը կրակոցներ չեն հնչել

Տավուշի մարզի Մովսես համայնքի գյուղապետ Լյուդվիգ Ապերյանը Լուրեր.com-ի հետ զրույցում հայտնեց, որ այս գիշեր կրակոցներ չեն եղել, հիմա էլ իրավիճակը նորմալ է:

«Մեր գյուղում ընդհանրապես խուճապ չի եղել, սովոր են արդեն, էդ կրակոցները համարյա ամեն օր լինում են: Հաճախակի է դարձել ու երկար: Մի ժամանակ եթե հենակետերին էին հիմնականում կրակում, հիմա արդեն գյուղին էլ են կրակում»,- նշեց նա:

Ներքին Կարմիրաղբյուրի գյուղապետ Մանվել Կամենդատյանը նույնպես Լուրեր.com-ին տեղեկացրեց, որ կրակոցներ միշտ էլ լինում են: «Գյուղը նշանառության տակ է, սահմանամերձ գյուղ չի, սահմանապահ է: Ժողովուրդը չի կարողանում ոչ մի աշխատանք կատարել: Միշտ էլ վտանգավոր է»:

Այգեպարի գյուղապետ Անդրանիկ Այդինյանը միայն ասաց, որ կրակոցներ հնչել են` նախընտրելով չպատասխանել այլ հարցերի: 

Չինարի գյուղի գյուղապետ Սամվել Սաղոյանը Լուրեր.com-ին ասաց, որ գյուղի ուղությամբ կրակոցներ չեն հնչել, իսկ գյուղացիների շրջանում խուճապ չկա:

«Չինարեցին 22 տարի շարունակ պատերազմի դաշտում է ապրում, ժողովուդրը պատրաստ է դրան: Շատ ցավալի է, որ հենակետերում մեր տղաներն են մահացել: Մենք գնալու ոչ մի տեղ չունենք, մենք մեր հողի տերն ենք, մեր ընտանիքի, մեր տան տերերն ենք: Այսօր իրավիճակը նորմալ է, բայց շատ զգոն ենք»,- ասաց գյուղապետը:

Հիշեցնենք, որ երեկ կեսօրին թշնամու կողմից ժամեր շարունակ գնդակոծվել են Տավուշի մարզի Այգեպար, Մովսես և Ներքին Կարմիրաղբյուր գյուղերը: Թշնամին կրակել է հիմնականում բնակելի տների ուղղությամբ: Ավելի վաղ ՀՀ ՊՆ քննչական ծառայության սպա Մերի Սարգսյանը Լուրեր.com-ի հետ զրույցում ասել էր, որ դիրքերում զոհեր և վիրավորներ չկան, սակայն գյուղերի մասին ոչինչ չի կարող հայտնել: