«Իրավունք». Այսօր պատմական օր է, բայց հայերն անտեղյակ են

Ինչպես գրում է «Իրավունք»-ը՝ «Այսօր տեղի է ունենալու մի իրադարձություն, որը պատմական նշանակություն է ունենալու ամբողջ աշխարհի համար: 18-ը նոյեմբերի, 2011 թվական՝ այդ օրը արձանագրվելու է պատմության մեջ որպես Եվրասիական միության ծննդյան օր, քանզի այսօր Մոսկվայում Ռուսաստանի, Բելառուսի և Ղազախստանի նախագահները ստորագրելու են Եվրասիական միության հռչակագիրը:

Բնականաբար, Եվրասիական միության ստեղծումը բացելու է նոր դարաշրջան՝ Ռուսաստանի երբեմնի զորության և ազդեցության վերականգնում: Պատահական չէ նաև, որ երեկ՝ պատմական իրադարձության նախօրեին, ռուսական բանակի գլխավոր շտաբի պետ գեներալ Նիկոլայ Մակորովը, անդրադառնալով Վլադիմիր Պուտինի հռչակած մյուս թեզին՝ ռազմաարդյունաբերական համալիրի վերականգնմանը, նաև չբացառեց, որ Ռուսաստանի սահմաններից ոչ հեռու կարող են լոկալ հակամարտությունները այնպես բորբոքվել, որ բանը կհասնի միջուկային զենքի կիրառմանը: Այսինքն՝ Մոսկվան պարզ հասկանում է, որ, ելնելով առողջ ազգային էգոիզմից, հաշվի չի առնի անգամ աշխարհի կործանման վտանգը, եթե Ռուսաստանին փորձեն խանգարել գերտերության կարգավիճակը վերականգնելու հարցում: Իսկ ինչպես հայտնի է, և միշտ է այդպես եղել, հաղթանակը տրվում է նրան, ով պատրաստ է ցանկացած գին վճարել:

Իսկ Երևանում սպասում են, թե օրվա լրահոսը ինչ պաշտոնանկությունների մասին ավետիս կբերի: Հայոց մայրաքաղաքում այժմ, ցավոք, մոլեգնում է ոչ թե ազգային էգոիզմը, այլ զուտ անհատական: Հոգեբան Կարինե Նալչաջյանը փաստում է, որ մեր երկրի թիվ 1 պրոբլեմը ներազգային հանդուրժողականության պակասն է: Ըստ հոգեբանի՝ ծանր սոցիալ-տնտեսական պայմանները մարդկանց մղում են էգոցենտրիզմի, որն արտացոլվում է բոլոր ոլորտներում: Կրոնական աղանդների ագրեսիվ հավատափոխության մոլուցքը տիկին Նալչաջյանը համեմատեց անգամ այն գործելակերպի հետ, որը թուրքերը կիրառում էին հայերի նկատմամբ Օսմանյան կայսրությունում»: