Արևային մարտկոցներով ինքնաթիռը ավարտել է իր ռեկորդային թռիչքը

Արևային մարտկոցներով Solar Impulse ղեկավարվող ինքնաթիռը բարեհաջող վայրէջք է կատարել Մարոկոյի Ռաբաթ մայրաքաղաքում՝ ավարտելով ռեկորդային միջմայրցամաքային թռիչքը։ Այս մասին հայտնում է France-Presse գործակալությունը։

Հոգեբույժ և ճանապարհորդ Բերտրան Պիկարն ինքնաթիռն իջեցրել է Ռաբաթի միջազգային օդանավակայանում երեքշաբթի օրը տեղական ժամանակով 23:30-ին։ Վայրէջքին հետևում էր Մարոկոյի Արեգակնային էներգիայի գործակալության պատվիրակությունը։

Solar Impulse ինքնաթիռը հաղթահարել է մոտ 2500 կիլոմետր տարածություն՝ օդում անցկացնելով գրեթե 48 ժամ։ Սա արեգակնային էներգիայի հիման վրա աշխատող ղեկավարվող թռչող սարքի ամենաերկարատև թռիչքն է։

Թռիչքը սկսվել է մայիսի 24-ին շվեյցարական Պեյերն քաղաքում։ Հաջորդ օրն ինքնաթիռը ժամանել է Մադրիդ օդաչուի փոփոխման համար։ Նախապես ծրագրվել էր, որ կանգառը կտևի երեք օր, սակայն հաջորդ մեկնարկը հետաձգվել էր անբարենպաստ եղանակային պայմանների պատճառով և վերսկսվել էր հունիսի 5-ի առավոտյան։

Արեգակնային էներգիայի հիմքով ինքնաթիռների հաջորդ ռեկորդը կլինի շուրջերկրյա թռիչքը, որում օդ կբարձրանա Solar Impulse-ի կատարելագործված տարբերակը։

Հիշեցնենք, որ ինքնաթիռի արտաքին մակերևութին կա 12000 արեգակնային մարտկոց, որոնք սնուցում են 4 պտուտակային էլեկտրաշարժիչ յուրաքանչյուրը 10 ձիաուժ հզորությամբ։ Ինքնաթիռում կա նաև 400 կիլոգրամ քաշով ակումուլյատոր, որը կուտակում է շարժիչների գիշերային աշխատանքի համար անհրաժեշտ էներգիան։ Solar Impulse-ի թևերի բացվածքը 63.4 մետր է, իսկ քաշը՝ 1.6 տոննա։