Մաշտոցի պուրակի քաղաքացիական պայքարում մեր հիմնական զենքը եղել է Սահմանադրությունը. ակտիվիստներ

Մաշտոցի այգու ակտիվիստները հունիսի 5-ից հուլիսի 5-ը հայտարարել են Սահմանադրության միամսյակ։ Նրանց տարածած հաղորդագրության մեջ մասնավորապես նշվում է.

«Մաշտոցի պուրակի քաղաքացիական պայքարում մեր հիմնական զենքը եղել է Սահմանադրությունը: Հուլիսի 5-ի Սահմանադրության տոնի կապակցությամբ հունիսի 5-ից հուլիսի 5-ը հայտարարում ենք Սահմանադրության միամսյակ:

Մաշտոցի պուրակում և այլ վայրերում կազմակերպելու ենք տարբեր միջոցառումներ՝ ելույթներ քաղաքացիական ամբիոնից, դասախոսություններ, քննարկումներ ֆեյսբուքում, լուսանկարների և ֆիլմերի ցուցադրություններ, մշակութային և քաղաքացիական ակցիաներ, համերգներ:

Ամեն ուրբաթ երեկոյան քաղաքացիական ամբիոնից կհնչեն ելույթներ սահմանադրական կարգի և դրա հաստատման թեմաներով: Շաբաթ և կիրակի երեկոները կլինեն լեցուն մշակութային միջոցառումներով և զանազան ակցիաներով: Բոլոր միջոցառումների մանրամասների մասին նախապես կհայատարարենք:

Կոչ ենք անում բոլոր համալսարանների ուսանողներին, փորձագետներին, լրագրողներին այս միամսյակի ընթացքում հանրային օրակարգ բարձրացնել սահմանադրությանն առնչվող տարբեր թեմաներ:

Բաց ենք ամեն տեսակ առաջարկների և ստեղծագործ մտքերի համար»։