ՀՅԴ-ն կարծում է, որ գնաճի հետ պետք է բարձրանան նաև աշխատավարձերը

Նոյեմբերի 17-ին խորհրդարանը շարունակեց քառօրյա նիստերի աշխատանքը: Նիստի ընթացքում խորհրդարանական խմբակցությունները ներկայացրին իրենց տեսակետները 2012թ. պետական բյուջեի մասին օրինագծի վերաբերյալ:

«Ժառանգություն» խմբակցության տեսակետը ներկայացնելով` Արմեն Մարտիրոսյանը տեղեկացրեց, որ իրենց վերաբերմունքը 2012թ. պետական բյուջեի վերաբերյալ դրական չէ: Ըստ նրա` բյուջեով նախատեսվող ՀՆԱ-ի աճը, տարածքային համաչափ զարգացման, ներդրումներն ավելացնելու, աղքատության եւ գործազրկության կրճատման ցուցանիշներն իրատեսական չեն: Պարոն Մարտիրոսյանը նշեց, որ իրենց խմբակցությունը եկամտային մասով կառավարությանն է ներկայացրել բյուջետային փաստաթղթի այլընտրանքային տարբերակ:

ՕԵԿ խմբակցության տեսակետը ներկայացրեց Հեղինե Բիշարյանը` նշելով, որ ՕԵԿ-ը դրական է գնահատում 2012 թ. պետական բյուջեի ցուցանիշները: Խմբակցության ղեկավարը նշեց, որ խմբակցությունը ներկայացրել է բազմաթիվ առաջարկություններ, որոնց քննարկվելու եւ ընդունվելու դեպքում իրենք կողմ կքվեարկեն պետական բյուջեի նախագծին: ՕԵԿ-ն առաջարկում է մինչեւ երկու տարեկան երեխայի խնամքի համար հատկացվող գումարը տրամադրել եւ աշխատող, եւ չաշխատող մայրերին, առաջին անգամ ամուսնացող նորաստեղծ ընտանիքներին տրամադրել միանվագ 300.000 դրամ աջակցություն, երկրորդ երեխայի ծննդյան դեպքում հատկացնել 100.000 դրամ 50.000 դրամի փոխարեն, իսկ չորրորդ երեխայի դեպքում` 1 միլիոն դրամ: Կարեւորվեց բյուջեով ավանդների վերադարձման գործընթացի եւ աղետի գոտու բնակարանաշինության   շարունակականությունը:

ՀՅԴ խմբակցության քարտուղար Արտյուշ Շահբազյանը տեղեկացրեց, որ իրենք բյուջեի նախագծին դրական եզրակացություն չեն տալու: Պարոն Շահբազյանն անդրադարձավ գնաճի պայմաններում աշխատավարձերի բարձրացման կարեւորությանը, երկրում աճող արտագաղթին, կառավարության իրականացրած վարկային քաղաքականությանը:

ԲՀԿ-ն կողմ է լինելու բյուջեի նախագծի ընդունմանը. այս մասին բարձրաձայնեց խմբակցության անդամ Վարդան Բոստանջյանը: Նա անդրադարձավ ֆինանսատնտեսական ճգնաժամի բացասական հետեւանքներին` նշելով, որ անգամ այդ պայմաններում կառավարությունը չկրճատեց սոցիալական ծրագրերի հատկացումները: Պարոն Բոստանջյանը համարձակ եւ ռիսկային քայլ համարեց հարկային եկամուտների ավելացումը շուրջ 101 մլրդ դրամով: Ըստ նրա` գործադիրը փորձում է հարկային վարչարարության որոշակի փոփոխություններով բարելավել հարկային քաղաքականությունը:

ՀՀԿ խմբակցության դիրքորոշումը ներկայացնելով` Հերմինե Նաղդալյանը նշեց, որ բյուջեի նախագիծը սահմանում է իրենց տեսլականը գալիք խորհրդարանական ընտրությունների տարում: Խմբակցության անդամն ընդգծեց, որ համաշխարհային ֆինանսատնտեսական ճգնաժամի պայմաններում կառավարության որդեգրած քաղաքականության նպատակն է եղել արագորեն շտկել ճգնաժամի հետեւանքով ստեղծված մակրոտնտեսական անկայուն վիճակը, վերադառնալ վերելքի փուլ եւ ստեղծել հիմքեր երկարաժամկետ ֆինանսական կայունության համար: Ըստ նրա` կառավարությունը ներկայացրել է ծրագրային, հասցեական եւ հաշվելի բյուջե, որն իրատեսական է ու հավասարակշռված: Տիկին Նաղդալյանի գնահատմամբ` 2012թ-ը տնտեսական աճի վերադարձի տարի է լինելու, շարունակական են լինելու գնաճային ճնշումներին հակազդելու միջոցառումները: ՀՀԿ խմբակցության անդամն ընդգծեց, որ ՀՀԿ-ն 2012 թ. շարունակելու է իրականացնել ՀՀԿ կուսակցական ու ՀՀ նախագահ Սերժ Սարգսյանի ծրագրերը: