Մահացել է ամերիկացի հայտնի գրող Ռեյ Բրեդբերին

Ամերիկացի հայտնի գրող, ֆանտաստիկայի ժանրի դասական Ռեյ Բրեդբերին մահացել է 92 տարեկան հասակում։ Այս մասին հայտնել է նրա թոռը՝ Դեննի Կարապետյանը։ Նրա մահվան պատճառները դեռ հայտնի չեն։

Ռեյ Բրեդբերին ծնվել է 1920–ի օգոստոսի 22–ին՝ Իլինոյս նահանգի Ուոկիգան քաղաքում։ 1934–ին՝ Մեծ դեպրեսիայի ժամանակաշրջանում, նրա ընտանիքը տեղափոխվել է Լոս Անջելես։

Նրա առաջին լուրջ աշխատանքը գեղարվեստական գրականության ոլորտում հրապարակվել է 1941–ին, ինչից հետո Բրեդբերին դառնում է ամսագրերում ամենաշատ տպագրվող գրողներից մեկը։ 

Նրա պատմվածքների առաջին ժողովածուն՝ «Մարսիան քրոնիկներ» (The Martian Chronicles), լույս է տեսել 1950-ին։ Այդ ժողովածուն՝ որպես ֆանտաստիկ ժանրի դասական աշխատանք, լուրջ ճանաչում բերեց Բրեդբերիին։

Այնուհետև Playboy ամսագրի առաջին համարներում հայտնվեց նրա հեղինակած «Ֆարենհեյթ 451» (Fahrenheit 451, 1953) վեպը։ Սրանից հետո Բրեդբերին համաշխարհային ճանաչում ձեռք բերեց։ 1967–ին այդ վեպի մոտիվներով ռեժիսոր Ֆրասնուա Տրյուֆֆոն ֆիլմ է նկարահանել։ 

Բրեդբերին իր կյանքի ընթացքում ԱՄՆ–ի իշխանությունների կողմից մի շարք բարձր պարգևների է արժանացել։