Հայաստանի պատվիրակությունը մասնակցել է Կաննի 65-րդ փառատոնի շրջանակներում գործող կինոշուկային

2012 թ. մայիսի 16-27-ը, արդեն չորրորդ անգամ, հայկական պատվիրակությունը Հայաստանի ազգային կինոկենտրոնի տնօրեն Գ. Գևորգյանի գլխավորությամբ մասնակցել է Կաննի փառատոնի շրջանակներում գործող կինոշուկային: Տասն օրերի ընթացքում հայկական տաղավարում տեղի են ունեցել բազմաթիվ հանդիպումներ, քննարկումներ միջազգային ճանաչում ունեցող դիստրիբյուտորական և պրոդյուսերական ընկերությունների, կինոֆոնդերի պատասխանատուների հետ: Քննարկվել և ներկայացվել են շուրջ 10 կինոնախագծեր, ինչպես նաև արտադրական և հետարտադրական փուլերում գտնվող ֆիլմեր:

Այս տարի կինոշուկայում ներկայացված բոլոր կինոնախագծերի և ֆիլմերի հեղինակներն անձամբ են մասնակցել կինոշուկայի աշխատանքներին և ներկայացրել իրենց նախագծերը:

Հայաստանի ազգային կինոկենտրոնի տնօրեն Գ. Գևորգյանը աշխատանքային երեք հանդիպումներ է ունեցել Ֆրանսիայի ազգային կինոկենտրոնի նախագահ Էրիկ Գարանդոյի ղեկավարած կենտրոնի մասնագիտական խմբի հետ, որի ընթացքում քննարկվել են երկու երկրների փորձագիտական խմբերի կողմից կինոյի մասին օրենքի նախագծի պատրաստման, հեղինակային իրավունքի և ֆիլմերի պահպանության խնդիրների, Հայաստանում ֆրանսիական մասնագետների կողմից վարպետության դասերի անցկացման, Ֆրանսիայում կինոմասնագետների, տեխնիկական կադրերի պատրաստման և մի շարք այլ կարևոր հարցերի շուրջ: Ձեռք բերված պայմանավորվածությունների համաձայն, մինչև տարեվերջ, Ֆրանսիայում վերապատրաստման դասընթացների կմասնակցեն մեկ-երկու պրոդյուսեր, իսկ հաջորդ տարվանից կվերապատրաստվեն նաև տեխնիկական մասնագետները: 2013 թ. երկու երկրների ազգային կինոկենտրոնները համատեղ արտադրության ուղղությամբ կծավալեն կոնկրետ աշխատանքներ. այս տարի Ֆրանսիայի ազգային կինոկենտրոնի կողմից ֆինանսավորվել են Արամ Շահբազյանի «Մոսկվիչ, իմ սեր» և Սերժ Ավեդիքյանի «Փարաջանով» անավարտ կինոծրագրերը: Ըստ նախնական պայմանավորվածության, Ֆրանսիայի ազգային կինոկենտրոնի պատասխանատուները կֆինանսավորեն երկու նոր նախագիծ ևս:

Ազգային կինոկենտրոնի տնօրենը Եվրոպական աուդիո-վիզուալ օբզերվատորիայի տնօրեն Վոլֆգանգ Քլոզի հետ քննարկել է այդ կարևոր կինոկազմակերպությանը Հայաստանի անդամակցության հարցը (այդ կառույցին անդամակցում են աշխարհի 38 հեղինակավոր կինոֆոնդեր ու կինոընկերություններ):

Հայաստանի ազգային կինոկենտրոնի տնօրեն Գևորգ Գևորգյանը հանդիպումներ է ունեցել նաև չինական պետական 2-րդ հեռուստաալիքի պատասխանատուների հետ, քննարկել է երկու երկրների միջև կինոհամագործակցություն սկսելու հարցերը, պայմանավորվածություններ ձեռք բերել ֆիլմերի փոխանակման, ինչպես նաև Հայաստանի և Չինաստանի մասին տեղեկատվական բնույթի ֆիլմերի նկարահանման ու ցուցադրման հարցերի շուրջ: Հայկական ֆիլմերի վերականգնման և դրանց դիստրիբյուցիան կազմակերպելու հարցերի շուրջ հայաստանյան պատվիրակության ղեկավարը հանդիպել է Ruscico դիստրիբյուտորական ընկերության ֆիլմերի վերականգնողական հարցերով տնօրենի հետ:

Հայկական բոլոր կինոնախագծերի շնորհանդեսները տեղի են ունեցել կինոշուկայի հայկական տաղավարում: Իսկ Հովհաննես Գալստյանի «Լուսավոր շրջան» ֆիլմի նախագիծը ներկայացվել է ռուսական տաղավարում, որը «EAVEN BEST» ծրագրում հաղթած նախագծերից մեկն է: Սույն ծրագրին մասնակցել է 60 կինոնախագիծ. ընտրվել է հինգը, այդ թվում` հայկականը: