Հայ-ադրբեջանական շփման գծում վերջին դեպքերը մտահոգիչ են. Վարդան Օսկանյան

ԲՀԿ-ական պատգամավոր, նախկին արտգործնախարար Վարդան Օսկանյանն իր Facebook-ի էջում անդրադարձել է հայ-ադրբեջանական սահմանին վերջին օրերին տեղի ունեցող միջադեպերին գրելով.

Հայ-ադրբեջանական շփման գծում վերջին դեպքերը մտահոգիչ են: Առավել մտահոգիչ է, որ դա տեղի է ունենում մի ժամանակ, երբ տարածաշրջանում է Ղարաբաղյան հարցի միջնորդ երկրներից մեկի՝ Միացյալ Նահանգների պետքարտուղարը:

Առհասարակ, 1994 թվականից զինադադարի պահպանմանը նպաստել է երկու բան՝ ա) բանակցություններով հարցի կարգավորման իրական հեռանկարը, բ) շփման գծի երկու կողմերում ռազմական հավասարակշռությունը:

Միշտ էլ սահմանային միջադեպերն առավել հաճախակի են եղել հատկապես այն ժամանակահատվածներում, երբ կա՛մ խնդրի բանակցային կարգավորման հեռանկարն է խարխլվել, կա՛մ, երբ շփման գծի որոշ հատվածներում հակառակորդին թվացել է, թե առավելություն ունի:

Այսօր հիմնական մտահոգությունն այն է, որ Ադրբեջանը մի կողմից իր առաջ քաշած անիրատեսական մաքսիմալիստական պահանջներով կորցնում է հարցի խաղաղ կարգավորման հեռանկարի նկատմամբ հավատը, մյուս կողմից՝ ռազմատենչ հայտարարությունների և սպառազինությունների վրա մեծ ծախսերի արդյունքում սկսում է հավատալ իր ռազմական առավելությանը: Ահավասիկ, այս երկուսի համադրման մեջ է վտանգը:

Հայկական կողմը և՛ դիվանագիտական, և՛ ռազմական առումով պետք է համարժեք պատասխան տա, որպեսզի Ադրբեջանը պատրանքներին չտրվի: