Վախճանվել է Ռեյ Բրեդբերին

Հունիսի 6-ին Լոս Անջելեսում կյանքի 92-րդ տարում վախճանվել է ամերիկյան մեծագույն ֆանտաստ գրողներից մեկը՝ Ռեյ Բրեդբերին, հայտնում է Associated Press-ը:

Մեծանուն գրողի մահվան լուրը հայտնել են նրա դուստրը և անձնական կենսագիր Սեմ Ուելլերը։

Բրեդբերին ծնվել է 1920 թվականի օգոստոսի 22-ին Իլլինոյս նահանգի Ուոքիգան քաղաքում։ 1934 թվականին նրա ընտանիքը տեղափոխվել է Լոս-Անջելես, որտեղ ապագա գրողն ավարտել է միջնակարգ դպրոցը, ինչից հետո, սակայն, բարձրագույն կրթություն չի ստացել։ Գրողի մասնագիտության մասին սկսել է երազել դեռ մանկությունից, երբ սկսել է գրել փոքրիկ պատմվածքներ՝ ներշնչված կոմիքսներից։ Առաջին անգամ տպագրվել 1938-ին։

Նրան առաջին մեծագույն հաջողությունն են բերել հռչակավոր «Մարսյան տարեգրությունները», որոնք լույս են տեսել 1950-ին, սակայն համաշխարհային հռչակը գրողին ապահովեց հակաուտոպիստական «451 ըստ Ֆարենհայտի» վիպակը (1953)։ Գրողի կարևորագույն գործերից է նաև «Գինի՝ խատուտիկներից» մասամբ ինքնակենսագրական վեպը։

Բրեդբերիի մի շարք գործեր նաև նկարահանվել են որպես ֆիլմեր, օրինակ Ֆրանսուա Տրյուֆոյի 1966 «451 ըստ Ֆարենհայտի» կտավը։ Կինեմատոգրաֆներն անդրադարձել են նաև նրա փոքր պատմվածքներին, որոնք կազմում են գրողի գրական ժառանգության մեծագույն մասը։

Բրեդբերին ստացել է բազմաթիվ գրական մրցանակներ, այդ թվում «Նեբուլա» և Հյուգոյի անվան, որոնք տրվում են գիտական ֆանտաստիկայի ոլորտի հաջողություննեի համար։ 2000 թվականին գրողն արժանացել է ԱՄՆ Գրքի ազգային մրցանակին «գրականության բոլոր ոլորտներում հսկայական ներդրման համար»։ Նրա ներդրումը 20-րդ դարի մարդու աշխարհայացքի ձևավորման հարցում իսկապես հսկայական է։ Մոլորակից պակասեց նրա մեծագույն բնակիչներից մեկը։