Գնաճ 0.3%-ով՝ նախորդ ամսվա համեմատ

2011 թ. նոյեմբերի 8-ի ՀՀ ԿԲ խորհրդի նիստում, որին մասնակցում էին` ՀՀ ԿԲ նախագահ Արթուր Ջավադյանը, խորհրդի անդամներ Ահարոն Չիլինգարյանը, Արմենակ Դարբինյանը, Աշոտ Մկրտչյանը, Օլեգ Աղասյանը, Վախթանգ Աբրահամյանը, ներկայացվեցին գնաճի, արտաքին միջավայրի, իրական, հարկաբյուջետային և դրամավարկային հատվածների ընթացիկ զարգացումները:

2011 թ. հոկտեմբերին 12-ամսյա գնաճը նախորդ ամսվա նույն ցուցանիշի նկատմամբ նվազել է 0.5 տոկոսային կետով և կազմել 5.7%՝ ընդհուպ մոտենալով 4%±1.5 տոկոսային կետ տատանումների թույլատրելի միջակայքի վերին սահմանին: Հոկտեմբերին ևս պարենային ապրանքների գնաճի նպաստումն ընդհանուր գնաճին գերակշռել է, 12-ամսյա կտրվածքով կազմելով 4.6 տոկոսային կետ, որից միայն 3.3 տոկոսային կետը բաժին է ընկել մսամթերքին (1.4 տոկոսային կետ), կաթնամթերքին (0.8տոկոսային կետ) կենդանական և բուսական յուղին (0.6տոկոսային կետ), շաքարավազին (0.5 տոկոսային կետ): Ոչ պարենային ապրանքների գների և ծառայությունների սակագների նպաստումները կազմել է յուրաքանչյուրը շուրջ 0.6-ական տոկոսային կետ:

Ըստ պաշտոնական վիճակագրության` 2011 թ. հոկտեմբերին նախորդ ամսվա նկատմամբ արձանագրվել է 0.3% գնաճ, որին 0.2 տոկոսային կետով նպաստել են պարենային (հիմնականում վերը նշված արպանքների գների աճի հաշվին), 0.1 տոկոսային կետով՝ ոչ պարենային ապրանքների գների աճը՝ հիմնականում կոշկեղենի, հագուստի հաշվին :

2011 թ. սեպտեմբերին Տնտեսական ակտիվության ցուցանիշը (ՏԱՑ) կազմել է 9%, որի պարագայում հունվար-սեպտեմբեր ժամանակահատվածի ՏԱՑ-ը կազմել է 6.4%: Աճն ամբողջությամբ արդյունք է տնտեսության բոլոր ճյուղերում, բացառությամբ շինարարության, արձանագրված թողարկման ծավալների աճի: Արդյունաբերության ճյուղում թողարկման ծավալների աճը կազմել է 13%, գյուղատնտեսության ճյուղում` 15.3%-ով, ինչն ամբողջությամբ բուսաբուծության ենթաճյուղի 28.9% աճի արդյունք է: Ծառայությունների ծավալներն աճել են 5.8%-ով, առևտրի ծավալները` 3.3%-ով: Շինարարության թողարկման ծավալների 20%-ով անկման պատճառը նախորդ տարվա համեմատությամբ միջազգային վարկերի, կազմակերպությունների և բնակչության միջոցների հաշվին իրականացվող շինարարության ծավալների կրճատումն է, որը փոքր-ինչ մեղմվել է պետական բյուջեի, համայնքների միջոցների հաշվին իրականացվող շինարարության ծավալների աճով: