Google-ը ներկայացրել է քաղաքների եռաչափ քարտեզների ծառայությունը

Google-ը ներկայացրել է իր նոր բարելավված քարտեզագրման ծառայությունը, որի շնորհիվ ընկերությունը հույս ունի ամրապնդել դիրքերն այդ շուկայում։ Սան Ֆրանցիսկոյում նախօրեին կայացած մամլո ասուլիսի ընթացքում ընկերության ներկայացուցիչը ներկայացրել է քարտեզների եռաչափ պատկերների տեխնոլոգիան։ Օգտվողը հնարավորություն ունի տեսնել եռաչափ պատկեր, որը կարող է մի քանի անգամ մեծացվել՝ տարածության մեջ տեղափոխելու համար, հաղորդում է BBC–ն։

Մինչև տարվա վերջ Google ընկերությունը ծրագրում է ստեղծել նման քարտեզներ բոլոր այն քաղաքներում, որիտեղի բնակչությունը գերազանցում է 300 հազարը։ Բացի այդ, Google-ը պատրաստվում է եռաչափ քարտեզների ծրագիրը թողարկել բջջային հեռախոսների և Android օպերացիոն համակարգով աշխատող այլ համակարգիչների և պլանշետների համար։ Օգտատերերին ընկերությունը նաև խոստանում է առաջիկայում ստեղծել շարժական նոր սարք, որի միջոցով կարելի է դիտել համայնապատկերներ։

Ընկերությունը հարկադրված թարմացնում է Google Maps–ի ծառայությունները՝ մտահոգվելով, որ առաջիկայում Apple ընկերությունը հնարավոր է՝ հրաժարվի իր արտադրած սմարթֆոներում Google-Maps-ի ծառայություններից։