Վերջ դնենք մարդկային ողբերգական կորուստներին. Հիլարի Քլինթոն

Վերջին 20 տարիների ընթացքում ԱՄՆ-ի և Ադրբեջանի միջև հարաբերությունները զգալիորեն ամրապնդվել են:

Այս մասին ասել է՝ ԱՄՆ Պետքարտուղար Հիլարի Քլինթոնը, չորեքշաբթի Բաքվում՝ Ադրբեջանի ԱԳՆ ղեկավար Էլմար Մամեդյարովի հետ համատեղ մամլո ասուլիսի ժամանակ։

Նա նշել է, որ չորեքշաբթի՝ Ադրբեջանի նախագահի և ԱԳՆ ղեկավարի հետ ունեցած հանդիպումների ժամանակ, տեղի են ունեցել քննարկումներ՝ երեք հիմնական ուղղություններով. անվտանգության, էներգետիկայի և ժողովրդավարության, հաղորդում է 1news.az–ը։

Անդրադառնալով հայ-ադրբեջանական, ԼՂ հակամարտությանը՝ պետքարտուղարը մտահոգություն է հայտնել հակամարտության գոտում վերջին օրերին առաջացած լարվածության կապակցությամբ, որը երկու կողմից մարդկային զոհերի է հանգեցրել։

«Ես վստահեցրել եմ նախագահ Ալիևին, որ ԱՄՆ–ը ոչինչ չի խնայելու Հելսինկյան եզրափակիչ ակտի հիման վրա համաձայնության հասնելու համար։ Ես խնդրել եմ Ադրբեջանի և Հայաստանի նախագահներին, որպեսզի երկու կողմերը ձեռնարկեն անհրաժեշտ քայլեր խաղաղության, այլ ոչ՝ հակամարտության համար։ Չկա հակամարտության կարգավորման ռազմական ճանապարհ», - ընդգծել է պետքարտուղարը։

Քլինթոնի խոսքով, մոտ ժամանակներում սպասվում է՝ Հայաստանի և Ադրբեջանի արտգործնախարարների հերթական հանդիպումը, որտեղ կքննարկվեն՝ ԼՂ հակամարտության խաղաղ կարգավորման նոր մոտեցումները։

«Այս հարցը պետք է լուծել, դրա լուծելու ժամանակը վաղուց եկել է: Ես խոստացել եմ Ադրբեջանի և Հայաստանի նախագահներին, որ մենք կանենք հնարավոր ամեն ինչ, որպեսզի լուծենք այս հարցը և վերջ դնենք մարդկային ողբերգական կորուստներին», - ասել է պետքարտուղարը: