Մենք պատրաստ ենք սատար կանգնելու մեր բանակին. Գրիշա Սարգսյան

Անդրադառնալով վերջին շրջանում Ադրբեջանի սադրիչ գործողություններին՝ «Փառապանծ մարտիկներ» միության նախագահ, Ռազմական ոստիկանության Արմավիրի նախկին պետ Գրիշա Սարգսյանը Լուրեր.com-ի հետ զրույցում նշեց, որ իրենց ամբողջ թիմը բերվել է մարտական պատրաստվածության, և իրենք պատրաստ են ցանկացած պահի գնալ և սատար կանգնել հայոց բանակին:

«Ես այսօր հրամանատար խորհրդի խորհրդակցություն եմ անցկացրել և բարձր մարտական պատրաստականության բերել «Փառապանծ մարտիկների» միությունը և Միլիցիայի հատուկ նշանակության ջոկատները:

Մենք պատրաստ ենք սատար կանգնելու մեր բանակին և թարմացնելու ադրբեջանցի զինվորների «հիշողությունները»՝ 1990-1994 թվականների հետ կապված, երբ մենք, բանակ չունենալով, հաղթանակ տարանք, իսկ հիմա ունենք հզոր բանակ և պատրաստ ենք կրկին անգամ պաշտպանելու մեր սահմանները, մեր ժողովրդին և հասնել մինչև Բաքու, հայկական հաղթական դրոշը տնկել և ծածանել Բաքվում:

Երկրորդը՝ մանավանդ հյուսիս-արևելյան սահմաններում՝ Տավուշում, Լոռու մարզում իմ նախաձեռնությամբ մեր միության բոլոր անդամները բերվել են բարձր մարտական պատրաստականության: Հեռախոսակապի միջոցով ստեղծել ենք օպերատիվ շտաբ և կանոնակարգում ու տիրապետում ենք իրավիճակին:

Գերագույն գլխավոր հրամանատարի առաջին իսկ կանչից և ՊՆ նախարարի առաջին իսկ հրամանից մենք մեր միության 70-80 տոկոսով գնալու ենք մեր հայրենիքը պաշտպանելու: Այսօր պատրաստակամություն ենք հայտնում և առավոտյան էլ իմ գլխավորությամբ ուղևորվելու ենք այնտեղ` տեղում ուսումնասիրելու և նաև Ոսկևանում կատարելու զոհված ազատամարտիկներին նվիրված հուշարձանի բացման արարողությունը՝ ապացուցելու, որ մենք հզոր ենք», - նշեց Գրիշա Սարգսյանը: