Նոր կոտորած Սիրիայում. Համա նահանգում 78 մարդ է զոհվել

Սիրիայի ընդդիմության ներկայացուցիչները հայտարարել են, որ առնվազն 78 մարդ է զոհվել Սիրիայի կառավարական ուժերի կողմից Համա նահանգում իրականացված բռնությունների հետևանքով։ Սակայն Սիրիայի իշխանության ներակայացուցիչները պնդում են, որ զոհերի թիվն ավելի քիչ է, և կոտորածը կազմակերպվել է «ահաբեկիչների» կողմից։ Հակամարտող կողմերի հաղորդագրությունների հավաստիությունը ստուգել հնարավոր չէ։

Սիրիայի ընդդիմության ազգային խորհրդի մամլո քարտուղարը հայտարարել է, որ կոտորածը տեղի է ունեցել Կուբաիր և Մաարզաֆ գյուղերում։ Զոհվել է 20 կին և բազմաթիվ երեխաներ։ 

Ողջ մնացած Կուբաիր գյուղի բնակչի հավաստմամբ՝ սպանությունները իրականացրել են Բաշար Ասադի ռեժիմի կողմնակիցները, հաղորդում է BBC–ն։

Սակայն Սիրիայի պետական հեռուսատալիքով հաղորդվել է, որ կառավարական ուժերը այդ գյուղերի բնակչությանը պաշտպանել են ահաբեկիչների նախապատրաստած հարձակումներից։

Հիշեցնենք, որ երկու շաբաթ առաջ Հուլայում առաջին զանգավածային կոտորածն էր տեղի ունեցել, որի պատճառով ավելի քան 108 մարդ էր զոհվել։ Տեղի բնակչությունը և ընդդիմության ներկայացուցիչները սպանությունների մեջ մեղադրում են Ասադի կողմնակիցներին։ 

Նշենք, որ 2011–ի մարտից Սիրիայի ընդդիմությունը զանգվածային հակառավարական բողոքի ցույցեր է անցկացնում՝ պահանջելով Սիրիայի նախագահ Բաշար Ասադի հրաժարականը։ Ըստ ՄԱԿ–ի վերջին տվյալների՝ ցուցարարների և կառավարական ուժերի միջև տեղի ունեցած բախումների պատճառով զոհվել է ավելի քան 13 հազար մարդ։