«Չորրորդ ինքնիշխանություն». Վարդան Օսկանյանն այցելել է Հովիկ Աբրահամյանին

Նախօրեին Ազգային ժողովի նախագահ Հովիկ Աբրահամյանին էր այցելել Արարատի մարզպետ Էդիկ Բարսեղյանը՝ Լոնդիկը: Երբ «ՉԻ»-ն Արարատի մարզպետից հետաքրքրվել է, թե ի՞նչ սաիթով է այցելել Հովիկ Աբրահամյանին, վերջինս ուղղակի զայրացել է: «Չհասկացանք, զարմանալի մարդիկ եք: Ձեզ ինչ հետաքրքիր ա, թե ինչի՞ եմ եկել: Եկել եմ, որովհետև Շարմազանովը իմ ընկերն է, Նաղղալյան Հերմինեն իմ հայրենակիցն է»:

«ՉԻ» տեղեկություններով, առաջիկայում Լոնդիկր զրկվելու է մարզպետի պաշտոնից, և նա պտտվում է Հովիկ Աբրահամյանի շուրջը՝ փորձելով նրան համոզել, որ Աբրահամյանը իրեն վստահի Ազգային ժողովի աշխատակազմի ղեկավարի պաշտոնը: Երեկ Հովիկ Աբրահամյանին էր այցելել նաև ՀՀԿ գործադիր մարմնի անդամ Ռուբեն Թադևոսյանը: «ՉԻ»-ն նրան էլ է հարց ուղղել Հովիկ Աբրահամյանի մոտ տեղի ունեցող հավաքի և իր այցի նպատակի մասին: Ռուբեն Թադևոսյանը հարցին հարցով է պատասխանել. «Իրավունք չունե՞մ Ազգային ժողով գալու»:

Թերթը նշում է, որ Հովիկ Աբրահամյանի շուրջը պտտվողների շարքում էր նաև խորհրդարանական ընտրությունների ժամանակ տանուլ տված Արարատի ՀՀԿ-ական քաղաքապետ Աբրահամ Բաբայանը, որը նույնպես երեկ Աժ-ում էր: Աժ նախագահի բոլոր խորհրդավոր հյուրերն էլ լռել են հավաքի նպատակի մասին:

Երեկ Ազգային ժողովի նախագահ Հովիկ Աբրահամյանին էր այցելել նաև ԲՀԿ քվոտայով պատգամավոր դարձած Վարդան Օսկանյանը: Աժ նախագահի մոտ կազմակերպված հավաքի նպատակի մասին նա ևս գերադասել է լռել: