Ադրբեջանին խաղաղ կարգավորման ուղու վրա կարող է դնել միայն ժողովրդավարական Հայաստանը. Լևոն Զուրաբյան

Հայ ազգային կոնգրեսի համակարգող, Կոնգրեսի խմբակցության ղեկավար Լևոն Զուրաբյանը գնահատելով սահմանում տեղի ունեցած վերջին միջադեպերը, որոնք, ի դեպ, սկսել են ԱՄՆ պետքարտուղար Հիլարի Քլինթոնի տարածաշրջան կատարած այցի ժամանակ, նշեց, որ դա կարող է և պատահականություն լինել, բայց կարող է նաև ռազմական գործողությամբ արտահայտված քաղաքական մեսիջ լինել Հայաստանին և միջազգային հանրությանը, որի իմաստն այն է, որ Ադրբեջանը չի ցանկանում հաշտվել ստատուս-քվոյի հետ, և սպառնում է հակամարտության ռազմական լուծմամբ:

«Չորրորդ ինքնիշխանության» հետ զրույցում Զուրաբյանը նշել է, որ այդ միջադեպերին հայաստանյան կողմի ռեակցիան միգուցե և ադեկվատ էր, «գուցե արվել է այն, ինչ հնարավոր է այսօրվա վիճակում անել»,- բայց նրա խոսքով, «Հայաստանի ռեակցիան ադեկվատ չէր վերջին տասնամյակի ընթացքում»:

«Որովհետև ի վերջո, այն, ինչ հիմա կատարվում է, դա հետևանք է տասնյակ տարիների ոչ կոմպետենտ, ապաշնորհ, միայն սեփական հարստացմամբ հետաքրքրվող մի իշխանության քաղաքականության: Կեղծված  ընտրություններ, քրեաօլիգարխիկ ռեժիմ, որ խեղդում է տնտեսական զարգացումը, դրա հետևանքով առաջացած արտագաղթ, խայտառակ վիճակ բանակում, այս ամենը միայն նպաստում է Ադրբեջանի լկտիությանը: Ադրբեջանը որևէ ստիմուլ չի տեսնում , որևէ շահագրգռվածություն չունի ղարաբաղյան խնդիրը խաղաղ ճանապարհով կարգավորելու մեջ: Ադրբեջանը այսօր համարում է, որ օրեցօր հզորանում է՝ շնորհիվ նավթային եկամուտների, ստրատեգիական ռազմական գնումների՝ ավիացիա և հեռահար արտիլերիա, մյուս կողմից էլ տեսնում է իր առաջ օրեցօր թուլացող Հայաստան: Ադրբեջանին այսօր խաղաղ կարգավորման ուղու վրա կարող է դնել միայն ժողովրդավարական, հզորացող Հայաստանը, որը դեռ գույություն չունի: Այնպես որ , միգուցե և իշխանության այսօրվա գործողությունները միանշանակ և ադեկվատ են, բայց այդ գործողությունների համաչափություն ու ադեկվատությունը որևէ կերպ չի կարող արդարացնել տասնյակ տարիներ վարող այս կործանարար քաղաքականությունը»,- նշեց Զուրաբյանը: