Պլուտոնն ու իր արբանյակներն օժանդակել են աստղագետներին կրկնակի աստղերի հետազոտություններում

Պլուտոնն ու իր արբանյակներն օժանդակել են աստղագետներին վերլուծել կրկնակի աստղային համակարգերի հավանական կառուցվածքը։ Գիտնականների հոդվածը լույս կտեսնի The Astrophysical Journal-ում։ Դրա առանձնատիպը հասանելի է arXiv.org կայքում։

Գիտնականներին այժման դրությամբ հայտնի է Պլուտոնի 4 արբանյակ՝ Քարոնը, Նյուկտեն, Հիդրան և դեռևս անանուն մի մարմին՝ հայտնաբերված 2011 թվականին Հաբլ դիտակի շնորհիվ։ Այս մոլորակի արբանյակային համակարգի տարբերակիչ առանձնահատկությունն այն է, որ արբանյակներից մեկի՝ Քարոնի զանգվածը կազմում է Պլուտոնի զանգվածի 12%-ը, ինչի հետևանքով Պլուտոն-Քարոն զույգն իրեն պահում է որպես կրկնակի մարմին՝ նման կրկնակի աստղային համակարգերին։

30 միլիոն տարվա ընթացքում այս համակարգի էվոլյուցիան նկարագրող համակարգչային մոդլելավորման և անանուն արբանյակի դիտումների փաստերի օգնությամբ գիտնականները պարզել են, որ վերջինիս և Նյուկտեի զանգվածները բավականին փոքր են, և այս համակարգը կիրառելի է կրկնակի աստղի շուրջ մոլորակների շարժման մոդելավորման համար։

Կրկնակի աստղային համակարգերում ուղեծրերի ստաբիլությունը շատ նուրբ խնդիր է, քանի որ համակարգի ներսում ավելի բարդ գրավիտացիոն փոխազեդության հետևանքով մոլորակներն ավելի հեռու են աստղերից, քան սովորական միաստղանի համակարգերում է։

Գիտնականները պնդում են, որ իրենց հաշվարկները կարելի է ստուգել, երբ New Horizons տիեզերական սարքը 2015 թվականին պատմության մեջ առաջին անգամ կմոտենա Պլուտոնին։ Հիշեցնենք, որ 2011-ի օգոստոսին Icarus պարբերականում հոդված էր տպագրվել այն մասին, որ այս հեռավոր մոլորականման մարմնի մակերևութի տակ հնարավոր է՝ գոյություն ունի հեղուկ օվկիանոս։ Հիշեցնենք, որ Պլուտոնն Արեգակից միջինում 40 անգամ ավելի հեռու է, քան Երկրագունդը։