Հարուստ հայերին «հարիֆացնում» են տաճարականների մասին հեքիաթներով

Հունիսի 3-ին երևանի «Արմենիա-Մարիոթ» հյուրանոցում տեղի ունեցավ հայայստանյան տաճարականների (տամպլիերների) հերթական հավաք-քննարկումը և ինչպես միշտ՝ խորհրդավորության քողի ներքո։

Հաշվի առնելով, որ հայոց հողում տաճականները հայտնվում են արդեն երկրորդ անգամ (առաջինը անցյալ տարվա սեպտեմբերի 8-ին էր)՝ հասարակության շրջանում հարցերն են առաջանում դրանց ով լինելու և Հայաստանում ունեցած նպատակների վերաբերյալ։

Այս նպատակով NovostiNK.ru-ի թղթակիցը դիմել է «Մալթյան միաբանությունը և դրա կեղծումները» գրքի հեղինակ, Սևծովյան-Կասպյան տարածաշրջանի քաղաքական և սոցիալական հետազոտությունների ինստիտուտի տնօրեն Վլադիմիր Զախարովին։ Էքսպերտի խոսքերով, Երևանում հունիսի 3-ին տեղի է ունեցել XX դարի երկրորդ կեսից ավանդական դարձած՝ հարուստ մարդկանց մեծածավալ «քցոցի»։ «Եթե որևէ մեկը իսկապես գտնում է, որ ասպետ է դարձել, կարող եմ համոզված ասել՝ ձեր ասպետությունը գրոշի արժեք չունի։ Դա չարժի այն փողերը, որ դուք մուծել եք այդ թատրոնի համար։ Ձեզ քցել են ամենավերջին հարիֆների պես։ Ու ոչ միայն ձեզ, ձեզպիսինները լիքն են Ռուսաստանում, ԵՄ երկրներում և Ամերիկյան մայրցամաքում»,- հայտարարել է Զախարովը։

Տարաբնույթ կեղծ-միաբանությունների ի հայտ գալն արդեն երկհարյուրամյա պատմություն ունի։ XX դ. սկզբին առաջինն ի հայտ եկան տարբեր Մալթյան միաբանությունները և ուխտերը, հետո սկսեցին իբր «վերակենդանացնել» ուրիշները, որոնցից մեկն էլ Տաճարի ասպետների ուխտն է։ Երբեմն ուղղակի հորիվում էին զանազան միաբանություններ, որոնք եբրև գոյություն չեն էլ ունեցել։ Զախարովի խոսքով, ամբողջ աշխարհով մեկ վազվզում են տարբեր միջնորդներ, որոնք բոլոր ցանկացողներին առաջարկում են ինչ-որ գումարի դիմաց ազնվական կոչումներ կամ ասպետական տիտղոսներ պարգևել։ Այդպիսիք կան նաև Ռուսաստանում։

«Ձեզ խաբում են, իսկ դուք հավատում եք՝ միայն կարևոր ֆիգուր դառնալու ցանկությունից կուրացած։ Եթե ծուլանում եք գրքեր կարդալ, դիմեք գոնե Հայաստանում ասպետական միաբանությունների լավագույն մասնագետին՝ վաստակաշատ պատմաբան, նախկին նախագահ Լևոն Տեր-Պետրոսյանին, որը ձեզ կբացատրի, որ չկան ոչ մի Տևտոնական, Տաճարական, Սուրբ Ագաթայի և այլ միաբանություններ և ուխտեր։ Այո, ձեզ կասեն, որ տաճարականների ուխտը գլխավորում է Մեծ Մագիստրոս և Իշխան Դոն Ֆերնանդո Պինտո Պերեյրա դե Սոուզա Ֆոնտեսը։ Նա նույնքան իշխան է, որքան ձեզանից յուրաքանչյուրը՝ Չինաստանի կայսր։ Զարմանում եմ, որ Հայաստանում այդ խայծը կերել է նաև կաթողիկոս Գարեգին Բ-ն։ Շատ վատ տեղեկատվական ծառայություն ունի նա, եթե չի գտնվել ոչ ոք, որ Նորին Սրբությանը բացատրի, որ նման անձանց հետ հանդիպել անգամ չի կարելի, էլ չեմ ասում՝ այդօրինակ "միջոցառմանը" հոգևորական ուղարկել»,- եզրափակել է փորձագետը։

Նշենք, որ հայաստանյան տաճարականների մասին առաջին անգամ խոսվել է 2011 թվականին, երբ Երուսաղեմի տաճարի բարձրագույն ռազմական միաբանությունը հայտարարել է «հայ տաճարականների» գունդ ստեղծելու իր մտադրության մասին։ Այս օրերին Հայաստանի 7 քաղաքացի ասպետ է օծվել։ Եվս 9 հոգի սպասում է իր հերթին որպես ասպետության թեկնածու, իսկ այդ արարողության օծման համար Էջմիածնից հոգևորական էր ուղարկվել։

Տարիել Մանվելյան

NovostiNK.ru