Սա մեր իշխանությունների խայտառակությունն է. Արամ Մանուկյան

«Զգուշավոր պատասխաններ պետք է տամ»։ ՀԱԿ ներկայացուցիչ, ԱԺ հինգերորդ գումարման պատգամավոր Արամ Մանուկյանը ԱՄՆ պետքարտուղար Հիլարի Քլինթոնի այցելության և սահմանում տեղի ունեցած միջադեպերի մեջ ուղիղ կապ չի տեսնում։

«Չեմ կարող ուղիղ կապ տեսնել Քլինթոնի այցելության և սահմանի դեպքերի մեջ։ Բոլոր դեպքերում, զգուշավորությունը ճիշտ բան է, որովհետև խնդիրը իրական մարդկային ճակատագրերի հետ է կապված։ Իրական ամբողջական տեղեկություն չունեմ, որպեսզի գնահատականներս ավելի հստակ լինեն»,– ասաց Մանուկյանը։

Նա նշեց, որ չի ընդունում ո՛չ Հայաստանի, ո՛չ էլ Ադրբեջանի իշխանությունների աքլորակռիվը, բարձր նոտաների վրա հայտարարությունները կամ «արծիվների» խելառ հայտարարությունները։

«Չեմ ընդունում «արծիվների» խելառ հայտարարությունները, որն արվում է պետական իշխանության կողմից, փոխնախարարի կողմից։ Ես դա ուղղակի մերժում եմ։ Սա մեր իշխանությունների խայտառակությունն է, որը թույլ է տալիս, որ պետական պաշտոնյան նման հիմարություններ անի։ Դա ապացույցն է բանի, որ մենք բանակ չունենք, իշխանություն չունենք։ Դրա պատասխանը իշխանությունը պետք է տա։ Եթե ես լինեի երկրի ղեկավար կամ վարչապետ, այդ մարդը հինգ րոպե էլ չէր աշխատի։ Դա ուղղակի ստվեր է մեր բանակի, մեր պաշտոնական համակարգի վրա»,– նշեց Մանուկյանը և վերջում հավելեց, որ չի ցանկանում, որ հայ–ադրբեջանական հարաբերություններում սրացում լինի։