Իրանը նույնպես պետք է դառնա Սիրիայի հարցով կոնտակտային խմբի անդամ. Քոֆի Անան

ՄԱԿ–ի և ԱՊԼ–ի Սիրիայի հարցով հատուկ բանագնաց Քոֆի Անանը գտնում է, որ Իրանը պետք է նույնպես դառնա Սիրիայի հարցով կոտնակտային խմբի անդամ։ Նա այդ մասին հայտարարել է ՄԱԿ–ի Անվտանգության խորհրդի Սիրիայի հարցով փակ նիստի ավարտից հետո կայացած ճեպազրույցի ընթացքում, հաղորդում է ԻՏԱՌ–ՏԱՍՍ-ը։

Ըստ Անանի, այժմ «քննարկվում է կոնտակտային խումբ ստեղծելու հնարավորությունը, որում պետք է ընդգրկվեն այնպիսի երկրներ, որոնք իրական ազդեցություն ունեն Սիրիայի իշխանության և ընդդիմության վրա»։ Ըստ նրա, նման կոնտակտային խմբի ստեղծման նպատակն է մեկտեղ համախմբել հակամարտող և խաղաղության հասնելու շահագրգիռ կողմերին, որպեսզի նրանք կարողանան «խնդրին սթափ մոտեցում դրսևորել Անանի խաղաղության ծրագիրն իրագործելու համար»։ Ըստ Անանի, հակառակ դեպքում տարածաշրջանում անխուսափելի կլինի պայթյունավտանգ իրավիճակը։

Նա հույս է հայտնել, որ «Իրանը, որպես տարածաշրջանում կարևոր երկիր կարող է նպաստել Սիրիայի խնդրի կարգավորմանը»։

Անանի այդ առաջարկին կտրականապես դեմ է արտահայտվել ՄԱԿ–ի ԱԽ–ում ԱՄՆ–ի ներկայացուցիչ Սյուզան Ռայսը։ Վերջինս ճեպազրույցի ընթացքում հայտարարել է, որ Իրանը այժմ ավելի շատ խոչընդոտում է Սիրիայի խնդրի կարգավորմանը քան օժանադակում, ավելացնելով, որ Թեհրանը լուրջ աջակցություն է ցույց տալիս Սիրիայի իշխանությանը։

«Իրանը ապակառուցողական դեր է խաղում տարածաշրջանում», – ասել է Ռայսը։