Ադրբեջանական կողմը սոցցանցերի միջոցով տեղեկատվական պատերազմ էր սկսել. Սամվել Մարտիրոսյան

Ադրբեջանական կողմը սոցցանցերում իրավիճակային ռեակցիա ցույց տվեց սահմանում տեղի ունեցած դեպքերին։ Այս մասին Լուրեր.com–ի հետ զրույցում ասաց տեղեկատվական անվտանգության փորձագետ, բլոգեր Սամվել Մարտիրոսյանը։

Նրա խոսքերով, սոցցանցերում հետաքրքիր զարգացումներ էին, երբ սահմանում տեղի է ունեցել առաջին հարձակումը, ադրբեջանցի օգտատերերի մոտ միանգամից սկսվել է ոգևորություն։

«Ադրբեջանական կողմում սկսվել էր ոգևորություն, որ «հեսա Ղարաբաղը վերցնում ենք, գրավենք, ուռա»։ Բայց հենց Հայաստանի կողմից հակառակ պատասխան գործողությունները եղան, միանգամից ինչ–որ դեպրեսիվ տրամադրություններ սկսվեցին։ Այդ ֆոնի վրա հետաքրքիրն այն էր, որ շատ օգտվողներ ինչ–որ իրենց ներքին հոգեբանական իրավիճակը շտկելու համար սկսեցին հավատալ բոլոր այն անհեթեթ տեղեկատվություններին, որոնք տարածում էր Ադրբեջանի Պաշտպանության նախարարությունը, թե հայկական կողմում ահռելի զոհեր կան»,– ասաց Մարտիրոսյանը և հավելեց, որ ապատեղեկատվություն էին տարածում։

Նա նշեց, որ սոցցանցերում հետաքրքիր զարգացում տեղի ունեցավ հենց այդ գիշեր, երբ սոցցանցերի մեծ մասը դրական տրամադրություն ստեղծելու համար, սկսեցին տարածել ադրբեջանական քարոզչության նյութերը։

«Ապատեղեկատվություն էին տարածում, թե Ֆիզուլիի ուղղությամբ հայկական կողմը հարձակում է սկսել, նույնիսկ հետո խոսեցին այն մասին, որ ամբողջ սահմանի երկայնքով մարտական իրավիճակ է, երկու կողմն էլ ծանր կորուստներ ունեն։ Այդ գիշեր ադրբեջանական կողմը սոցցանցերի միջոցով տեղեկատվական պատերազմ սկսեց։ Մարդիկ իրոք հավատում էին, որ պատերազմ է սկսվել։ Եվ քանի որ իրենք չափից ավել էին վստահում սեփական տեղեկատվությանը, դա բերեց նրան, որ պատերազմի մասին լուրերը բավականին լուրջ խուճապ ստեղծեցին»,– ասաց նա, և հավելեց, որ խուճապը երկկողմանի էր, մի մասը գտնվում էր ծանր ներքին իրավիճակի մեջ, մյուս մասը հիստերիկ ոգևորության մեջ էր, որ «հեսա գնում ենք գրավենք»։