«Երևանյան հեռանկարներ» 13-րդ երաժշտական միջազգային փառատոնը հյուրընկալում է Լոս Անջելեսի «Դիլիջան» երաժշտական փառատոնին

«Երևանյան հեռանկարները» ս. թ. հունիսի 10-17-ը ներկայացնում է Լոս Անջելեսի «Դիլիջան» երաժշտական փառատոնը, որը 8 համերգով հանդես կգա Հայաստանում՝ մայրաքաղաքում և Դիլիջանում: Լոս Անջելեսի «Դիլիջան» երաժշտական փառատոնի հանդիսավոր բացումը տեղի կունենա հունիսի 10-ին, Կոմիտասի անվան կամերային երաժշտության տանը, ժամը՝ 19:00-ին: Կհնչեն Արամ Խաչատրյանի, Տիգրան Մանսուրյանի, Սերգեյ Պրոկոֆևի և Վ. Ա. Մոցարտի գործերից:

Դիլիջանյան կամերային երաժշտության համերգաշարը հիմնադրվել է 2005 թ. «Լարք» երաժշտական ընկերության անդամների կողմից և հանդիսականները ու քննադատները միաձայն ճանաչել են որպես Լոս Անջելեսի ամենահեղինակավոր և նորարարական փառատոներից մեկը: Դիլիջանյան փառատոնի առաքելությունն է կատարել և շարունակաբար նպաստել հայ երաժշտական ժառանգության հանրահռչակմանը, ժամանակակից կոմպոզիտորների կողմից ավելի քան 20 նոր ստեղծագործությունների ստեղծմանը, այդ թվում՝ արդի հայ կոմպոզիտորների, որոնց բոլոր առաջին կատարումները եղել են Լոս Անջելեսի «Զիփեր» համերգասրահում: Հանրահայտ այդ համերգասրահում անցկացվում են միմիայն բարձր գեղարվեստական որակի համերգներ, աշխարհահռչակ երաժիշտների մասնակցությամբ ։ Ի նշանավորումն «Դիլիջան» փառատոնի և «Լարք» երաժշտական ընկերության հաջողությունների, կատարողական արվեստում ունեցած նշանակալի ձեռքբերումների, ինչպես նաև ժամանակակից երաժշտության զարգացման գործում ունեցած ավանդի համար՝ դիլիջանյան համերգաշարի գեղարվեստական ղեկավար Մովսես Պողոսյանը արժանացել է 2011 թ. «Ֆորտե» մրցանակի:

Դիլիջանյան համերգաշարի օրերին հայաստանյան ունկնդրի առջև հանդես կգան հանրահայտ 20 մենակատար արտիստներ, այդ թվում՝ մեր հայրենակից ալտահար Քիմ Քաշքաշյանը, ում անվան հետ է կապված ալտ գործիքի հանրահռչակումը, «Մետրոպոլիտեն» օպերային թատրոնի աստղ, ռուս բարիտոն Վլադիմիր Չերնովը, «Գրեմմի»-ի մրցանակակիր, թավջութակահար Անտոնիո Լիսինը, Դիլիջան կամերային փառատոնի գեղարվեստական ղեկավար, անվանի հայ ջութակահար Մովսես Պողոսյանը, բրիտանացի լեգենդար թավջութակահար, ծագումով Շրի Լանկայից՝ Ռոհան դե Սարամը, Լոս Անջելեսի Ֆիլհարմոնիկ նվագախմբի հիմնական կլարնետահար Միշել Զուկովսկին, սոպրանո Թոնի Արնոլդը, մեր օրերի լավագույն ալտահարներից՝ հարավկորեացի Ռիչարդ Օ’Նիլը, ճապոնացի հարվածային գործիքների կատարող, հռչակավոր Կունիկո Կատոն, ով կներկայացնի պողպատյա թմբուկների ներկայացում֊-համերգ, Իզայի քառյակի առաջին ջութակ Գիյոմ Սյուտրը, տավղահար Կյունգ Հի Քիմ Սյուտրը, ամերիկացի կոնտրաբասահար Դավիթ Պարմեթերը, առաջատար ամերիկացի կոմպոզիտոր, բազմաթիվ մրցանակների դափնեկիր Յան Քրուզը, ամերիկահայ երգչուհի Շուշիկ Բարսումյանը և Լոս Անջելեսի Ֆիլհարմոնիկ նվագախմբի ջութակահարուհի Վարթի Մանվելյանը, ինչպես նաև Թրենոդի լարային քառյակը՝ Ամբրուազ Օբրյուն /ջութակ/, Քրիստափոր Նաջարյան /ջութակ/, Էլիսոն Սփիթ /ալտ/, Ժասմին Լաու /թավջութակ/ կազմով:

«Երևանյան հեռանկարներ» երաժշտական միջազգային փառատոնն անցկացվում է Հայաստանի Հանրապետության նախագահ Սերժ Սարգսյանի բարձր հովանու ներքո։

Փառատոնի աջակիցն է ՀՀ մշակույթի նախարարությունը։