Քննարկվեց «Տեղական ինքնակառավարման մասին» ՀՀ օրենքում փոփոխությունների նախագիծը

ՀՀ փոխվարչապետի, տարածքային կառավարման նախարարի պաշտոնակատար Արմեն Գեւորգյանի մոտ այսօր Արդարադատության նախարարության, շահագրգիռ հասարակական կազմակերպությունների ներկայացուցիչների մասնակցությամբ տեղի ունեցած խորհրդակցությանը քննարկվեց «Տեղական ինքնակառավարման մասին» ՀՀ օրենքում փոփոխությունների նախագիծը:

Նախագիծը բխում է Հայաստանի կողմից ստորագրված Տեղական ինքնակառավարման եվրոպական խարտիայի լրացուցիչ՝ Ուտրեխտի արձանագրությունից, ըստ որի սահմանվում է տեղական ինքնակառավարմանը քաղաքացիների մասնակցության իրավունք:

Ներկայացված նախագծով սահմանվում են տեղական ինքնակառավարմանը քաղաքացիների մասնակցությունն ապահովող մեխանիզմներ: Մասնավորապես՝ քաղաքացիների նախաձեռնող խմբի միջոցով կարող են հարցեր ընդգրկվել համայնքի ավագանու նիստի օրակարգ: Բացի այդ, նախատեսվում է համայնքի համար կարեւոր նշանակություն ունեցող հարցերի՝ համայնքի զարգացման ծրագրերի, տարեկան բյուջեի կազմման, քաղաքաշինական հատակագծի, բնապահպանական խնդիրների հանրային քննարկման մեխանիզմի ներդրում՝ մինչ ավագանու նիստում այդ հարցերի ընդգրկումը:

Ա. Գեւորգյանն աշխատանքային խմբին առաջարկեց լրամշակել նախագիծը՝ հաշվի առնելով նաեւ ստացված առաջարկությունները եւ այն տեղադրել ՏԿՆ կայքէջում: