«Հրապարակ».ՀՀ փաստաբանների պալատի նախագահ Ռուբեն Սահակյանի դուստրը՝ դատավոր

ՀՀ փաստաբանների պալատի նախագահ Ռուբեն Սահակյանի դուստրը՝ փաստաբան Զառա Դանիելյանը, սովորում է դատավորների դպրոցում, և առաջիկայում հավանաբար նա դատավոր կնշանակվի: Ընդ որում՝ հոր խոսքերով, գերազանց է սովորում: Դատավոր դառնալու մեջ, իհարկե, վատ բան չկա, բայց այն փաստը, որ Փաստաբանների պալատի նախագահի դուստրը փորձում է դատավոր դառնալ՝ չբավարարվելով փաստաբանի կարգավիճակով և իր հորը դնելով բավական նուրբ կացության մեջ, տարակուսանքի տեղիք է տալիս: Դստեր դատավոր դառնալուց հետո Ռուբեն Սահակյանը թերևս այլևս չի կարող դատական համակարգի հակընդդեմ կառույցի՝ Փաստաբանների պալատի լիարժեք նախագահ լինել: Հայաստանում նման բան պարզապես հնարավոր չէ: Թեև Սահակյանը պնդել է, որ մեկը մյուսի հետ կապ չունի, և այստեղ «ոչ մի հակասություն էլ չկա»:

«Իմ դստեր դատավոր դառնալը որևէ կերպով չի կարող խոչընդոտ հանդիսանալ իմ և Փաստաբանների պալատի գործունեության վրա: Բացարձակապես կապ չունեն մեկը մյուսի հետ»,-թերթի հետ զրույցում ասել է ՓՊ նախագահը՝ հավելելով. «Եթե դպրոցն ավարտելուց հետո կնշանակվի դատավոր և վատ կաշխատի, ես առաջինը ինքս կքննադատեմ ու կքարկոծեմ իրեն»:

Թերթը հիշեցնում է, որ այս օրերին Փաստաբանների պալատն ակցիա է նախաձեռնել, և հունիսի 11-ին պատրաստվում են մեկօրյա գործադուլ հայտարարել ընդդեմ վճռաբեկ դատարանի գործունեության: Երեկ երեկոյան այդ ակցիային միացել էին 366 փաստաբաններ: Հետաքրքիր է՝ փաստաբանները կշարունակե՞ն նման ակցիաներ անել, երբ ՓՊ նախագահի դուստրը դատավոր լինի: