Մեկնարկում է «Հայ գորգագործական մշակույթը» խորագրով հանրապետական առաջին գիտաժողովը

Ս. թ. նոյեմբերի 18-19-ը Հ. Շարամբեյանի անվան ժողովրդական ստեղծագործության կենտրոնում կկայանա «Հայ գորգագործական մշակույթը» խորագրով հանրապետական գիտաժողով, որը կանդրադառնա հայ ժողովրդի պատմամշակութային ժառանգության ուսումնասիրման ու արժևորման հարցում առաջնային նշանակություն ունեցող` ՀՀ թանգարաններում պահվող հայոց ժողովրդական կիրառական գեղազարդման արվեստին վերաբերող արժեքներին, մասնավորապես, գորգերին ու գորգագործությանը` որպես ազգային ինքնության ու ավանդույթների յուրահատուկ կրողների:

ՀՀ մշակույթի նախարարության և Հ. Շարամբեյանի անվան ժողովրդական ստեղծագործության կենտրոնի նախաձեռնությամբ ընթացող գիտաժողովին կհնչեն երկու տասնյակ զեկուցումներ, այդ թվում` մասնակիցները կանդրադառնան հայոց գորգագործական մշակույթի ծագումնաբանության հիմնահարցերին, հայոց ոստայնագործական մշակույթի առանձնահատուկ տեսակի` գոբելենի ծագումնաբանությանը, հայկական զարդարվեստի երկրաչափական մոտիվների ու դրանց արդի կիրառության հարցերին, քննության կառնվի նաև ադրբեջանական գորգագործական արվեստի լայնամասշտաբ քարոզչության ու հայկական գորգերը յուրացնելու հավակնությունների հարցը:

Գիտաժողովի օրերին կգործի նաև «Գորգը` ինքնության վկայագիր» խորագրով ցուցադրությունը` Հովհ. Շարամբեյանի անվ. ժողովրդական ստեղծագործության կենտրոնի գորգերի հավաքածուից:

Գիտաժողովի բացմանը ողջույնի խոսքով հանդես կգան ՀՀ մշակույթի նախարարի տեղակալ Արթուր Պողոսյանը, ՀՀ ԳԱԱ Հնագիտության և ազգագրության ինստիտուտի տնօրեն Պավել Ավետիսյանը, ՀՀ ԳԱԱ Արվեստի ինստիտուտի տնօրեն Արարատ Աղասյանը: Գիտաժողովը կբացի Հովհ. Շարամբեյանի անվ. ժողովրդական ստեղծագործության կենտրոնի տնօրեն Հովիկ Հովեյանը: