Դաշնակցական երիտասարդներն արդեն Չինարիում են

ՀՅԴ Հայաստանի Երիտասարդական Միության 50 երիտասարդներ, ՀՅԴ ԳՄ-ի անդամներ, ազատամարտիկներ և դաշնակցական պատգամավոր Արծվիկ Մինասյանն այժմ գտնվում են սահմանամերձ Չինարի գյուղում: 

Lurer.com-ի հետ զրույցում ՀՅԴ ՀԵՄ-ի վարչության անդամ Ազատուհի Սիմոնյանը նշեց, որ այցի նպատակն է հանդիպել սահմանամերձ գյուղի բնակիչներին և իրենց զորակցությունն ու աջակցությունը հայտնել տեղի բնակչությանը` բարձրացնելու նրանց հայրենասիրական ոգին և գյուղի բարոյա-հոգեբանական մթնոլորտը: 

Երիտասարդները գյուղում հավաքել են դպրոցականների, կազմակերպել են պարի, նկարչության և  երգի ուսուցման դասընթացներ, իսկ 2 ժամից կազմակերպելու են համերգ, որտեղ գյուղի բնակչությանը զորակցության խոսք կհայտնի Արծվիկ Մինասյանը, գյուղի երեխաները կներկայացնեն սովորած երգերն ու պարերը: Համերգին կերգեն  նաև սիրված երգիչներ Սահակ Սահակյանը և Դավիթ Ամալյանը, իսկ համերգի ընթացքում երիտասարները համակարգիչ կնվիրեն գյուղի դպրոցին:

ՀԵՄ-ի անդամ Հակոբ Մեսրոպյանն էլ ավելացրեց, որ իրենք նման այցով ուզում են ցույց տալ, որ քաղաքաբնակ երիտասարդությունը նույնպես մտահոգ է և ապրում է նաև սահմանամերձ գյուղում բնակվողի հոգսերով` նշելով, որ նման այցերը կլինեն պարբերական: 

Այցելուների խոսքով` իրենց այցը գյուղի բնակիչների համար մեծ իրադարձություն է, ամբողջ գյուղը հավաքվել է հյուրերին հանդիպելու, իսկ արդեն 1 ժամ գյուղում եղած ժամանակահատվածում դեռևս չի հնչել ոչ մի կրակոց: