Սիրիայում հակակառավարական ցույցերի հետևանքով ավելի քան 14 հազար մարդ է զոհվել

Առնվազն 14.115 մարդ է սպանվել 2011–ի մարտից Սիրիայում ընթացող հակակառավարական բողոքի ցույցերի հետևանքով։

Ինչպես հայտնել են Լոնդոնում գտնվող Սիրիայում մարդու իրավունքների պաշտպանության հարցերով դիտորդական խորհրդի ներկայացուցիչները, սպանվածների ընդհանուր թվից 9.862–ը եղել են խաղաղ բնակիչներ, 3.470–ը՝ կառավարական զորուժի զինվորներ, 783–ը՝ սիրիական բանակի դասալիքներ։

Հիշեցնենք, որ Սիրիայի ընդդիմության տվյալներով՝ այս գիշեր Հոմս քաղաքում կառավարական զորքի հրետանային ռմբակոծության հետևանքով սպանվել է առնվազն 35 մարդ։ Կառավարական ուժերը Հոմսում և հարակից տարածքներում վերսկսել են հրետանային ռմբակոծությունները՝ փորձելով վերականգնել նախկին ազդեցությունն այդ շրջանում։  

Syrian Observatory for Human Rights իրավապաշտպան կազմակերպության տվյալներով՝ նախօրեին Սիրիայում սպանվել է ավելի քան 80 խաղաղ բնակիչ։ Ըստ տեղեկությունների՝ առնվազն 20 մարդ է զոհվել կառավարական ուժերի՝ Սիրիայի հարավում գտնվող Դերաա քաղաքը հրետանային ռմբակոծության ենթարկելու հետևանքով։ Զոհերի թվում կան կանայք և երեխաներ։

Սիրիայում արդեն ավելի քան մեկ տարի է՝ շարունակվում են հակակառավարական բողոքի ցույցերը։ Ամեն օր տեղեկություններ են ստացվում մարդկային զոհերի մասին, որոնց թվում են ինչպես խաղաղ բնակիչներ, այնպես էլ ուժային կառույցների ներկայացուցիչներ։ ՄԱԿ–ի տվյալներով՝  Սիրիայում զոհերի թիվը գերազանցում է 12 հազարը։