Նապոլեոնի՝ անվարժ անգլերենով գրված նամակը վաճառվել է 325,000 եվրոյով

Ֆրանսիայի կայսր Նապոլեոն Բոնապարտի անգլերեն նամակը՝ ուղարկված իր ուսուցչին, երեկ աճուրդում վաճառվել է 325,000 եվրոյով՝ նախատեսված գնից 5 անգամ ավելի թանկ։ Այն համառ պայքարի արդյունքում ձեռք է բերել Ֆրանսիայի Ձեռագրերի և նամակների թանգարանը։

Նամակը, որը Նապոլեոնի տնային հանձնարարությունն էր և պարունակում է մի քանի ուղղագրական և քերականական սխալ, գրվել է 1816 թվականի մարտի 9-ին և կնքված է եղել կայսերական արծվի մոմե կնիքով։ Աշխարհում պահպանվել է Նապոլեոնի կողմից գրված երեք անգլերեն նամակ։

«Նապոլեոնն իրոք մեծ հիացմունք ուներ Անգլիայի, նրա ավանդույթների և պատմության հանդեպ։ Անգլիացիները սխալ կարծիք ունեն. Նապոլեոնը չէր ատում նրանց, նա պարզապես զինվորական էր, և Ֆրանսիայի շահերը չէին համընկնում Անգլիայի շահերի հետ։ Իհարկե, նրան նաև շատ էր մտահոգում իր համբավը։ Նապոլեոնը ցանկանում էր իմանալ, թե ինչ է գրում իր մասին անգլիական մամուլը»,- ասել է փորձագետներից մեկը։

Նապոլեոնն անգլերեն է սկսել սովորել կյանքի վերջին տարիներին։ Անգլերենի պարապմունքները լցնում էին Ս. Հեղինե կղզի աքսորված նախկին կայսեր ժամանակի մեծ մասը, սակայն, ինչպես նշում են մասնագետները, նա այդպես էլ լիովին չի տիրապետել անգլերենին։