Ադրբեջանն ունի ռազմական պլան՝ 2014-ին պատրաստվել պատերազմի. Ռիչարդ Կիրակոսյան

Ադրբեջանն ունի ռազմական պլան՝ 2014-ին պատրաստվել պատերազմի: Այս մասին այսօր լրագրողների հետ հանդիպմանն ասաց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը:

Նա նշեց, որ չնայած նրան, որ Ադրբեջանը դեռևս պատրաստ չէ պատերազմի, բայց պատրաստությունն ընթացքի մեջ է: Ըստ բանախոսի դա կլինի սպառնալիք և կդիտվի որպես վերջնաժամկետ ղարաբաղյան հարցի զարգացումների հետ կապված:

Անդրադառնալով լրագրողներից մեկի այն հարցին, թե ինչո՞ւ 2014-ին, Կիրակոսյանն ասաց, որ դա զինադադարի պայմանագրի կնքման քսանամյակն է:

«Ադրբեջանն այդ ժամանակ կզգա նաև նավթային ռեսուրսների սպառման վտանգը, ինչպես նաև դա կապված է Սոչիում տեղի ունենալիք օլիմպիական խաղերի հետ: Իսկ խաղն էլ կնշանավորվի նրանով, որ Ռուսաստանի ուշադրությունը շեղված կլինի և նա չի արձագանքի»: